Reshjet e shumta të ditëve të fundit kanë sjellë probleme në disa qarqe të vendit, me dalje të lumenjve nga shtrati dhe rritje të ndjeshme të niveleve ujore në hidrocentralet kryesore. Situata më e ndjeshme paraqitet në kaskadën e Drinit, ku prurjet natyrore kanë arritur vlera të larta.
Sipas të dhënave zyrtare, në HEC Fierzë prurjet kanë shkuar rreth 2300 metra kub në sekondë, në HEC Koman rreth 1150 metra kub në sekondë, ndërsa në HEC Vau i Dejës rreth 400 metra kub në sekondë. Në total, prurjet në kaskadë llogariten rreth 3850 metra kub në sekondë.
Aktualisht, në HEC-et e Komanit dhe Vaut të Dejës kanë nisur shkarkimet e kontrolluara të ujërave, ndërsa në Fierzë ende nuk raportohet shkarkim. Konkretisht, në Fierzë shkarkimet janë në nivelin zero, në Koman 1200 metra kub në sekondë, ndërsa në Vaun e Dejës 1600 metra kub në sekondë. Ky nivel shkarkimi në Vaun e Dejës pritet të vijojë i pandryshuar edhe në orët në vijim.
Sa i përket niveleve të liqeneve, ato raportohen në 285 metra në Fierzë, 174.13 metra në Koman dhe 75 metra në Vaun e Dejës. Akumulimi i volumit total të ujit në kaskadë vlerësohet rreth 2250 metra kub në sekondë, me pjesën më të madhe të përqendruar në liqenin e Fierzës.
Në këto kushte, prodhimi ditor i energjisë elektrike raportohet në rreth 12 130 megavat-orë. Korporata Elektroenergjetike Shqiptare bën me dije se situata po monitorohet në mënyrë të vazhdueshme dhe se menaxhimi i prurjeve dhe shkarkimeve po kryhet sipas protokolleve, me synim garantimin e sigurisë dhe përdorimin efikas të burimeve ujore. /skyweb.al
