Çmimi i cigareve vijon të rritet, duke rënduar më tej xhepin e duhanpirësve. Shtrenjtimi lidhet me kalendarin e akcizës për duhanin, të miratuar në vitin 2022, i cili parashikon një skedul pesëvjeçar rritjeje progresive me qëllim dekurajimin e konsumit të duhanit.
Janari i vitit 2026 shënon vitin e fundit të zbatimit të këtij kalendari. Sipas parashikimeve, akciza për duhanin rritet mesatarisht me 250 lekë për kilogram, çka pritet të reflektohet në çmimin final të paketave me rreth 20 deri në 30 lekë.
Deri më 31 dhjetor 2025, detyrimi i akcizës për cigaret dhe purot që përmbajnë duhan ishte 7.500 lekë për 1.000 fije. Nga 1 janari 2026, kjo vlerë rritet në 7.750 lekë për 1.000 fije cigare.
Paralelisht, në Strategjinë Afatmesme të të Ardhurave 2024–2027 është parashikuar hartimi i një kalendari të ri për rritjen e akcizës së duhanit dhe nënprodukteve të tij për periudhën pas vitit 2027. Në dokument theksohet se Shqipëria ende nuk aplikon një skemë të kombinuar taksimi për duhanin, e cila përfshin si tarifë specifike për njësi produkti, ashtu edhe një përqindje mbi çmimin e shitjes, praktikë që përdoret gjerësisht në vendet e Bashkimit Europian.
Sipas strategjisë, qëllimi i kalendarit të ri është përafrimi gradual me nivelin e akcizës së aplikuar në BE dhe unifikimi i trajtimit fiskal mes duhanit dhe nënprodukteve të tij.
Të dhënat tregojnë se rreth 25 për qind e popullsisë madhore në Shqipëri konsumon duhan. Një studim i organizatës Development Solutions Associates tregon se niveli i duhanpirjes mbetet i lartë, veçanërisht te meshkujt, ku 42 për qind konsumojnë duhan, kundrejt 7 për qind te femrat.
Nga ana fiskale, akciza përbën rreth 11 për qind të të ardhurave tatimore vjetore të shtetit, ndërsa afërsisht 35 për qind e të ardhurave nga akciza sigurohen nga nënproduktet e duhanit. /skyweb.al
