Autoriteti i Aviacionit Civil (AAC) ka njoftuar vendosjen e një kufizimi të përkohshëm të fluturimeve mbi zonën e Pallatit të Kongreseve në Tiranë, në kuadër të aktiviteteve që do të zhvillohen për festimin e Ditës së Pavarësisë së Shteteve të Bashkuara të Amerikës.
Sipas njoftimit zyrtar, kufizimi do të zbatohet më 17 qershor 2026, nga ora 18:00 deri në 21:00 sipas orës lokale, me kërkesë të autoriteteve të sigurisë dhe në koordinim me Albcontrol.
Perimetri i kufizimit përfshin një rreze prej 150 metrash nga qendra e Pallatit të Kongreseve, ndërsa lartësia e kufizuar arrin deri në 120 metra mbi nivelin e detit. Masa do të publikohet përmes NOTAM-it përkatës.
Gjatë intervalit të përcaktuar, nuk do të lejohet operimi i mjeteve ajrore pa pilot (dronëve) brenda zonës së kufizuar. AAC u bën thirrje mediave dhe operatorëve të dronëve që të marrin masat e nevojshme dhe të shmangin planifikimin apo realizimin e fluturimeve gjatë orarit të ndalimit.
Sipas Autoritetit, kjo masë është ndërmarrë për të garantuar sigurinë gjatë zhvillimit të aktiviteteve festive dhe për të siguruar menaxhimin e koordinuar të hapësirës ajrore në zonën përkatëse.
Autoriteti i Aviacionit Civil ka theksuar se mbetet në dispozicion për çdo informacion apo sqarim shtesë në lidhje me zbatimin e këtij kufizimi të përkohshëm.
