Nëse dëshironi të blini bileta avioni të lira , koha kur bëni rezervimin ka shumë rëndësi. Studime të ndryshme ndërkombëtare dhe të dhëna nga kompanitë e udhëtimeve tregojnë se ekziston një “moment i artë” gjatë javës kur çmimet janë më të favorshme.
E marta dhe e mërkura, ditët më të mira për të blerë bileta
Ekspertët e industrisë së fluturimeve dhe platforma të ndryshme sugjerojnë se dita më e mirë për të prerë biletën është e marta ose e mërkura. Arsyeja është se shumë kompani ajrore publikojnë ofertat dhe uljet e reja të hënën në mbrëmje. Deri të martën në mëngjes ose pasdite, konkurrentët përgjigjen me çmime të ulëta, duke krijuar një “luftë çmimesh” që favorizon udhëtarët sipas Skyweb.al.
Ndërsa java avancon, sidomos nga e enjtja e tutje, çmimet kanë tendencën të rriten për shkak të afërsisë me fundjavën, kur kërkesa për bileta, veçanërisht për udhëtimet e shkurtra ose turistike, rritet ndjeshëm.
Ora më e mirë – herët në mëngjes
Përveç ditës, edhe ora ka rëndësi. Çmimet më të ulëta zakonisht publikohen gjatë natës ose herët në mëngjes, para orës 9:00. Në këtë kohë, inventari i ofertave është i freskët dhe konkurrenca nga blerësit e tjerë është më e ulët.
Pse ndodh kjo?
Kompanitë ajrore përdorin algoritme që përcaktojnë çmimin në kohë reale bazuar në kërkesën, numrin e biletave të mbetura dhe afërsinë me datën e nisjes. Kur kërkesa është e ulët — zakonisht në mesjavë dhe jashtë orareve të pikut — çmimet janë më të favorshme. Nga ana tjetër, në fundjavë dhe në oraret e zakonshme të punës, më shumë njerëz kërkojnë bileta, duke i shtyrë çmimet lart.
Këshilla shtesë:
-
Rezervoni të paktën 6-8 javë përpara për udhëtimet ndërkombëtare.
-
Përdorni modalitetin “incognito” në shfletues për të shmangur rritjen artificiale të çmimit pas kërkimeve të përsëritura.
-
Fokusohuni në orët e hershme të javës për të përfituar nga ofertat më të mira.
Në përfundim, nëse doni të kapni një biletë më të lirë, planifikoni kërkimin tuaj të martën ose të mërkurën në mëngjes, dhe sigurohuni të veproni shpejt – pasi biletat më të lira nuk qëndrojnë gjatë./skyweb.al
