Gjykata Kundër Korrupsionit dhe Krimit të Organizuar ka caktuar masën e sigurisë “arrest në burg” për tetë persona të arrestuar në kuadër të operacionit të SPAK-ut ndaj call center-ave mashtruese që vepronin në kryeqytet.
Sipas vendimit të gjykatës, për dy prej të arrestuarve masa e sigurisë është caktuar me afat 20 ditë, ndërsa për pjesën tjetër është vendosur arrest me burg pa afat.
Në pranga janë vendosur:
Remir Gjoligaj – arrest me burg
Endri Gjata – arrest me burg
David Qerimi – arrest me burg
Elis Merkaj – arrest me burg
Rentjan Peposhi – arrest me burg me afat 20 ditë
Odeas Kuqi – arrest me burg me afat 20 ditë
Hysen Xhepexhiu – arrest me burg
Klaudio Kaçupi – arrest me burg
Sakaq, vijon puna për kapjen e tre personave të tjerë të shpallur në kërkim.
Sipas SPAK, grupi kriminal vepronte në dy ambiente të vendosura në katin e nëntë dhe të trembëdhjetë të një ndërtese në qendër të Tiranës, përballë Katedrales Ortodokse, ku mashtronin shtetas italianë dhe europianë për investime në kriptomonedha.
Hetimi u nxit edhe nga materialet e dorëzuara në SPAK nga gazetarët e emisionit investigativ italian “Le Iene”, të cilat ndihmuan në dokumentimin e aktivitetit mashtrues.
Sipas njoftimit zyrtar, veprimtaria ishte e organizuar në mënyrë të strukturuar, me role të ndara dhe poste të përcaktuara pune, ndërsa stafi komunikonte në gjuhën italiane, franceze, spanjolle dhe gjermane. Organizatorët kishin ndërtuar gjithashtu një sistem të avancuar sigurie, duke përdorur kamera dhe personel vëzhgimi jashtë ambienteve të call center-it, pranë kullës “Atti Tower”.
SPAK bën me dije se për dy ditë me radhë janë ndjekur lëvizjet e organizatorëve, të cilët ndryshonin ambientet për t’i shpëtuar hetimit. Mbrëmjen e 15 janarit, personeli i vëzhgimit ka njoftuar drejtuesit për një ndërhyrje të mundshme, ndërsa mëngjesin e 16 janarit janë larguar pajisjet dhe është boshatisur ambienti i call center-it.
Pas verifikimeve, janë identifikuar personat dhe automjetet e përdorura për transportin e pajisjeve kompjuterike. Në një kohë të shkurtër, SPAK realizoi kapjen në flagrancë të disa shtetasve, të cilët po transportonin materialet drejt një ambienti tjetër të marrë me qira.
Në katin e pestë të një objekti tjetër në qendër të Tiranës u zbulua një tjetër call center, ende në ndërtim e sipër.
Gjatë kontrolleve u sekuestruan pajisje kompjuterike, telefona, laptopë, hard disqe, karta SIM, dokumente dhe blloqe me shënime. Disa prej personave të kapur po transportonin edhe sende të hedhura në një kosh mbeturinash, të cilat po tentonin t’i asgjësonin.
Me urdhër të SPAK janë kontrolluar 28 ambiente, përfshirë banesa, automjete, zyra dhe garazhe, ku janë sekuestruar kompjuterë, kamera sigurie, sisteme rrjeti, servera dhe automjete të ndryshme. /skyweb.al
