Hyrjet e shtetasve të huaj në Shqipëri kanë shënuar rritje të fortë dhe të vazhdueshme gjatë dekadës së fundit.
Nga 4.1 milionë hyrje në vitin 2015, numri u rrit në gati 12.5 milionë në vitin 2025, një rritje totale prej mbi 200%. Vetëm në vitin 2025, krahasuar me 2024, hyrjet u shtuan me 6.6%, duke konfirmuar vijimësinë e trendit rritës edhe pas bumit turistik të viteve të fundit.
Pesha kryesore e hyrjeve vazhdon të mbetet rajonale. Kosova kryeson bindshëm me mbi 4.6 milionë hyrje në vitin 2025, e ndjekur nga Italia me 1.29 milionë dhe Greqia me rreth 804 mijë hyrje.
Maqedonia e Veriut dhe Mali i Zi mbeten gjithashtu burime të rëndësishme, me flukse të larta dhe relativisht të qëndrueshme ndër vite, çka tregon se lëvizja ndërkufitare në Ballkan përbën ende boshtin kryesor të hyrjeve në vend.
Ndërkohë, rritjen më të fortë afatgjatë e kanë shënuar disa shtete të Europës Perëndimore dhe Qendrore.
Franca, Gjermania, Çekia, Polonia, Holanda dhe Mbretëria e Bashkuar kanë shumëfishuar hyrjet që nga viti 2015, me rritje që variojnë nga rreth 300 deri në mbi 600%. Gjermania veçohet edhe për rritjen vjetore të vitit 2025, me mbi 20% më shumë hyrje krahasuar me 2024.
Rritje të ndjeshme shfaqin edhe disa tregje më të largëta. Shtetet e Bashkuara arritën mbi 241 mijë hyrje në vitin 2025, ndërsa India, Izraeli dhe Ukraina regjistruan rritje shumë të larta si në terma vjetorë, ashtu edhe në krahasim me vitin 2015. Këto zhvillime tregojnë zgjerimin gradual të hartës së origjinës së vizitorëve, përtej rajonit tradicional.
Nga ana tjetër, disa shtete shënuan rënie në vitin 2025, përfshirë Rusinë, Turqinë, Poloninë dhe Rumaninë, si dhe kategorinë “Vende të tjera të Botës”, e cila vijon të tkurret ndjeshëm krahasuar me vitin 2015.
Këto luhatje lidhen kryesisht me faktorë gjeopolitikë, ndryshime tregjesh dhe përqendrim më të madh te tregjet europiane. /tvscan.al
