Një sërë faqesh interneti, përfshirë platformën e mediave sociale X, kanë pësuar ndërprerje për shkak të një problemi teknik në shërbimin “Cloudflare”, raporton Independent.
Përdoruesit që tentuan të hynin në faqe si X (dikur Twitter) dhe platformën e rishikimeve të filmave “Letterboxd” u përballën me mesazhe gabimi, të cilat tregonin se problemet me “Cloudflare” po pengonin ngarkimin e përmbajtjes.
“Cloudflare” është një nga furnizuesit kryesorë të infrastrukturës së internetit, duke ofruar shërbime që mbrojnë faqet nga sulmet kibernetike dhe ndihmojnë në menaxhimin e trafikut të lartë për të garantuar që ato të qëndrojnë online.
Kompania njoftoi se është në dijeni të situatës dhe po heton një problem që “mund të ndikojë potencialisht në shumë klientë”.
Ndërprerja vjen vetëm një muaj pas një defekti të madh në “Amazon Web Services”, i cili çoi në shkëputjen e më shumë se 1,000 faqesh dhe aplikacionesh. Pak më vonë, edhe “Microsoft Azure” u godit nga një problem i ngjashëm.
Sipas disa ekspertëve, këto incidente theksojnë sa i brishtë është interneti modern dhe sa shumë mund të ndikojë një defekt i vetëm në një numër të vogël kompanish që mbajnë pjesën më të madhe të infrastrukturës globale online. /Skyweb.al
