Spanja gjobit kompanitë Wizz Air dhe Transavia pas abuzimeve me koston e bagazheve të dorës, vendimi vjen pas gjobave të tjera në nëntor ndaj kompanive Ryanair, EasyJet,etj.
Qeveria spanjolle ka gjobitur kompanitë ajrore me kosto të ulët Wizzair dhe Transavia për aplikimin e tarifave ndaj pasagjerëve për bagazhin e dorës, duke e konsideruar këtë një praktikë abuzive dhe të paligjshme.
Vendimi vjen pas gjobave të mëparshme ndaj pesë kompanive të tjera, si Ryanair, Vueling, EasyJet, Norwegian dhe Volotea, të cilat në nëntor të vitit 2024 u ndëshkuan me një total prej 179 milionë eurosh.
Lajmi u konfirmua sot në Bruksel nga ministri spanjoll për të Drejtat Sociale, Çështjet e Konsumatorit dhe Agjendën 2030, Paolo Bustinduy, gjatë një deklarate në selinë e Organizatës Evropiane të Konsumatorëve (BEUC).
“Edhe këto dy kompani po ndjekin të njëjtën rrugë si pesë të mëparshmet,” deklaroi ai, duke theksuar se vendimi për gjobitjen tashmë është marrë.
Në të njëjtin aktivitet, BEUC dhe Rrjeti Evropian i Konsumatorëve njoftuan paraqitjen e një ankese zyrtare në Komisionin Evropian kundër shtatë linjave ajrore: Wizzair, Transavia, Ryanair, EasyJet, Norwegian, Vueling dhe Volotea.
Sipas autoriteteve spanjolle, aplikimi i tarifave për bagazhin e dorës përbën një shkelje të të drejtave themelore të konsumatorëve dhe cenon transparencën në çmimet e biletave ajrore.
Skyweb.al ka denoncuar edhe më herët praktikat abuzuese të Wizz Air ndaj pasagjerëve për çmimet e biletave dhe të bagazheve.
Spanja po kërkon që këto praktika të ndalohen në të gjithë Bashkimin Evropian./ilsole–skyweb.al
