Platforma ndërkombëtare AirlineRatings.com ka publikuar renditjen e vitit 2026 për kompanitë ajrore më të sigurta në botë, duke përfshirë 25 transportues full-service dhe 25 low-cost, të përzgjedhur nga mbi 320 kompani ajrore që monitorohen në nivel global.
Vlerësimi i këtij viti tregon se hendeku mes kompanive të renditura në krye është më i ngushtë se kurrë më parë. Sipas të dhënave të AirlineRatings, diferencat e pikëzimit janë minimale dhe nuk pasqyrojnë dallime reale në nivelin e sigurisë operacionale. Brenda kategorisë full-service, vetëm pak pikë ndajnë një numër të madh kompanish, ndërsa gjashtë transportuesit e parë ndahen nga një diferencë simbolike, duke konfirmuar se siguria në majën e industrisë është tashmë e standardizuar.
Për vitin 2026, kryesimin e listës së kompanive full-service e merr për herë të parë një transportues nga Gjiri Persik. Vlerësimi është ndërtuar mbi disa elementë kyç, si flota moderne, frekuenca shumë e ulët e incidenteve për fluturim, mungesa e aksidenteve fatale dhe përmirësimet e vazhdueshme në menaxhimin e sigurisë, përfshirë trajtimin e situatave me turbulenca.
Pas vendit të parë, renditen kompani të konsoliduara ndërkombëtare, të njohura prej vitesh për standarde të larta sigurie dhe operim të qëndrueshëm.
Lista e këtij viti shënon edhe hyrje të reja, duke reflektuar zgjerimin e transportuesve që përmbushin kriteret më të larta të sigurisë. Njëkohësisht, një kompani e madhe aziatike rikthehet në renditje pas një viti mungesë, pas përfundimit të verifikimeve dhe auditimeve shtesë që pasuan një incident serioz të lidhur me kushtet atmosferike.
Në kategorinë low-cost, raporti thekson se standardet e sigurisë janë tashmë të krahasueshme me ato të kompanive tradicionale. Për të dytin vit radhazi, vendi i parë ruhet nga një transportues me bazë në Azi, i vlerësuar për flotën e re, rezultatet pozitive në auditimet e sigurisë dhe normën shumë të ulët të incidenteve. Risi për vitin 2026 është përfshirja e një kompanie kineze për herë të parë në këto renditje, si edhe ngjitja e ndjeshme e një transportuesi europian në dhjetëshen e parë.
Sipas AirlineRatings, të gjitha kompanitë e përfshira në renditjen e këtij viti kanë regjistruar incidente gjatë dy viteve të fundit, që variojnë nga probleme teknike deri te ngjarje në pistë apo ndërprerje motorësh. Megjithatë, norma reale e incidenteve për fluturim mbetet jashtëzakonisht e ulët, duke reflektuar nivelin e lartë të sigurisë në industrinë globale të aviacionit.
Raporti nënvizon se në aviacionin modern, siguria nuk matet me mungesën absolute të incidenteve, por me aftësinë për t’i menaxhuar ato në mënyrë efektive, përmes kulturës së sigurisë, trajnimit të vazhdueshëm të ekuipazheve dhe konsistencës operacionale në miliona fluturime çdo vit.
Kompanitë më të sigurta për 2026:
- Etihad
- Cathay Pacific
- Qantas
- Qatar
- Emirates
- Air New Zealand
- Singapore Airlines
- EVA Air
- Virgin Australia
- Korean Air
- STARLUX
- Turkish Airlines
- Virgin Atlantic
- ANA
- Alaska Airlines
- TAP Air Portugal
- SAS
- British Airways
- Vietnam Airlines
- Iberia
- Lufthansa
- Air Canada
- Delta2
- American Airlines3
- Fiji Airways.
/skyweb.al
