Tregu i pasurive të paluajtshme ka shënuar rritjen më të fortë mes aktiviteteve të shërbimeve në tremujorin e parë të vitit 2026, duke konfirmuar se ekonomia vijon të mbështetet ndjeshëm te ndërtimi dhe qarkullimi i pronave.
Të dhënat e INSTAT për statistikat afatshkurtra të shërbimeve tregojnë se aktivitetet e pasurive të paluajtshme regjistruan rritje të shitjeve neto në volum me 31.5% krahasuar me tremujorin e parë të vitit 2025.
Rritja është dukshëm më e lartë se në shumicën e aktiviteteve të tjera të shërbimeve dhe vjen në të njëjtën periudhë kur edhe ndërtimi vijon të zgjerohet, sipas të dhënave të veçanta të INSTAT për prodhuesit e të mirave.
Pasuritë e paluajtshme përfshihen te shërbimet sepse ky aktivitet nuk mat ndërtimin e objekteve, por qarkullimin ekonomik të pronës, si shitblerjet, dhënien me qira, ndërmjetësimin imobiliar dhe administrimin e pasurive.
Përveç shitjeve, edhe treguesit e punësimit dhe pagave në këtë sektor kanë shënuar rritje të fortë. Sipas INSTAT, punësimi në aktivitetet e pasurive të paluajtshme u rrit me 22.5%, ndërsa fondi i pagave u rrit me 35% krahasuar me të njëjtën periudhë të një viti më parë.
Këto të dhëna tregojnë se aktiviteti në tregun e pronave nuk është rritur vetëm në vlerë shitjesh, por edhe në numër të punësuarish dhe pagesa të deklaruara në sektor.
Rritja e fortë e pasurive të paluajtshme lidhet me dinamizmin e tregut të banesave, qirave, ndërmjetësimit dhe shërbimeve të tjera të lidhura me pronën. Në praktikë, sektori përfiton nga volumi i lartë i ndërtimeve, shitjet e apartamenteve, qarkullimi i pronave ekzistuese dhe kërkesa për qira.
Të dhënat e INSTAT tregojnë se edhe turizmi vijon të mbështesë sektorin e shërbimeve. Hotelet regjistruan rritje të shitjeve neto në volum me 12.6%, ndërsa bar-restorantet me 8.4%. Punësimi në hotele u rrit me 9.4%, ndërsa fondi i pagave në këtë aktivitet u rrit me 22%.
Rritje shënoi edhe tregtia, me 4.6%, si dhe aktivitetet e arkitekturës dhe inxhinierisë, me 8%, një tregues që lidhet gjithashtu indirekt me ecurinë e sektorit të ndërtimit dhe projekteve të reja.
Por jo të gjitha aktivitetet e shërbimeve ishin në rritje. Transporti, magazinimi dhe posta shënuan rënie të shitjeve me 3.8%, ndërsa informacioni dhe komunikacioni ra me 1.6%. Aktivitetet ligjore dhe të kontabilitetit ranë me 4.3%, ndërsa administrimi i zyrave dhe mbështetja administrative shënuan rënie 5.4%.
Tabloja tregon se shërbimet po ecin me ritme të ndryshme. Në krye të rritjes qëndron real estate, i ndjekur nga hotelet, bar-restorantet dhe aktivitetet e lidhura me arkitekturën e inxhinierinë. Në anën tjetër, disa sektorë si transporti, administrimi i zyrave dhe shërbimet ligjore e kontabël kanë shënuar rënie.
Në tremujorin e parë të vitit 2026, ekonomia e shërbimeve duket se është mbështetur fort te tregu i pronave dhe turizmi. Rritja e pasurive të paluajtshme, bashkë me ecurinë pozitive të ndërtimit, tregon se kantieret, apartamentet, qiratë dhe ndërmjetësimi imobiliar vijojnë të jenë ndër motorët kryesorë të aktivitetit ekonomik në vend. /skyweb.al
