Për disa njerëz, pavarësisht sa orë flenë, ndjenja e lodhjes dhe mungesës së energjisë vazhdon. Dhe kjo është shumë më e zakonshme nga sa mendohet, shkruan BBC.
Sipas një meta-analize të vitit 2023 që përfshiu 91 studime në tre kontinente, një në pesë të rritur në botë përjeton lodhje të përgjithshme që zgjat deri në gjashtë muaj, edhe pa pasur ndonjë sëmundje themelore. Në SHBA, një sondazh i vitit 2019 nga National Sleep Foundation zbuloi se 44% e të rriturve ndiheshin të përgjumur dy deri në katër ditë në javë. Ndërsa një sondazh i vitit 2022 nga YouGov në Mbretërinë e Bashkuar tregoi se një në tetë persona ndiheshin të lodhur “gjithë kohën”. Gratë rezultojnë më të prekura se burrat.
Mjekja e familjes Rosalind Adam thotë se lodhja është një nga ankesat më të shpeshta në praktikën e saj. Madje, Shërbimi Kombëtar Shëndetësor britanik ka një akronim për të: TATT (“Tired All The Time” , i lodhur gjatë gjithë kohës).
Ekspertët theksojnë se lodhja nuk është e njëjtë me përgjumjen. Përgjumja është prirja për të fjetur, ndërsa lodhja është më komplekse dhe përfshin dimensione fizike, mendore dhe emocionale. Sipas Christopher Barnes nga Universiteti i Uashingtonit, lodhja është një koncept i gjerë që përfshin forma të ndryshme të ndjenjës së rraskapitjes.
Ekziston lodhja fizike, si pas një aktiviteti të rëndë, por edhe ajo njohëse dhe emocionale, që shfaqet me mjegullim të mendjes, vështirësi për t’u përqendruar apo nervozizëm. Sipas Vicky Whittemore nga Instituti Kombëtar i Shëndetit në SHBA, shkenca vetëm kohët e fundit ka nisur të kuptojë më mirë mekanizmat neurologjikë të lodhjes.
Lodhja mund të jetë simptomë e sëmundjeve si kanceri, skleroza multiple, depresioni apo “long Covid”, por shpesh mund të lidhet edhe me faktorë më pak seriozë si stresi, ngarkesa mendore, cilësia e dobët e gjumit apo problemet emocionale.
Ekspertët theksojnë se nuk ka rëndësi vetëm sasia e gjumit (zakonisht rekomandohen 7–9 orë për të rriturit), por edhe cilësia e tij. Mungesa e pushimit cilësor mund të çojë në dhimbje koke, nervozizëm, humor të ulët dhe probleme në marrëdhënie. Studimet tregojnë se kur një partner është i privuar nga gjumi, konfliktet në çift rriten.
Në përfundim, edhe nëse fle mjaftueshëm, lodhja mund të vijë nga shumë faktorë të tjerë , fizikë, mendorë apo emocionalë dhe shkenca ende po përpiqet ta kuptojë plotësisht këtë fenomen të përhapur. /skyweb.al
