Një test gjaku që mund të zbulojë disa lloje kanceri me një shpim të vetëm? Kjo ide, që deri dje dukej si fantashkencë, po afrohet gjithnjë e më shumë me realitetin. Megjithatë, ekspertët paralajmërojnë se entuziazmi duhet të shoqërohet me kujdes, shkruan Wall Street Jornal.
Së fundmi, kompania e telemjekësisë Hims & Hers promovoi gjatë finales së Super Bowl një test të ri për zbulimin e hershëm të kancerit, duke e sjellë teknologjinë eksperimentale në vëmendjen e miliona shikuesve. Testi më i avancuar në këtë fushë quhet Galleri, i cili synon të identifikojë sinjale të disa llojeve të kancerit përmes analizës së ADN-së që qarkullon në gjak.
Këto teste, të njohura si “multi-cancer early detection” (MCED), janë ende në faza të ndryshme zhvillimi dhe studimi. Edhe pse disa prej tyre janë tashmë në treg, ato nuk kanë marrë miratim të plotë nga Administrata Amerikane e Ushqimit dhe Barnave (FDA), dhe nuk ka ende prova përfundimtare se përdorimi i tyre ul vdekshmërinë nga kanceri.
Disa mjekë dhe ekspertë të shëndetit publik shprehin shqetësime se testet mund të japin rezultate të rreme pozitive, duke shkaktuar ankth dhe ekzaminime të panevojshme, ose të mos zbulojnë disa raste reale të sëmundjes. Po ashtu, mbetet e paqartë se si duhet të integrohen këto analiza në programet ekzistuese të depistimit.
Nga ana tjetër, mbështetësit argumentojnë se zbulimi i hershëm i kancerit është një nga armët më të fuqishme kundër sëmundjes dhe se testet e gjakut mund të ndihmojnë në identifikimin e tumoreve që aktualisht nuk kanë metoda efektive skriningu.
Ndërsa teknologjia përparon me shpejtësi, pyetja kryesore mbetet: a janë këto teste gati për përdorim masiv, apo duhet pritur prova më të forta shkencore? Për momentin, shumë specialistë këshillojnë që pacientët të informohen mirë dhe të konsultohen me mjekun para se të zgjedhin teste të tilla. /skyweb.al
