Japonia ka miratuar përdorimin e qelizave staminale për trajtimin e sëmundjes së Parkinsonit, duke shënuar trajtimin e parë të këtij lloji në botë, raportoi salute.eu.
Kompania farmaceutike Sumitomo Pharma ka marrë autorizimin për të zbatuar këtë terapi të re. Trajtimi synon të përmirësojë simptomat motorike te pacientët që nuk kanë pasur rezultate të kënaqshme nga terapitë ekzistuese me ilaçe.
Sipas Paolo Maria Rossini, drejtor i Departamentit të Neuroshkencës dhe Neurorehabilitimit në IRCCS San Raffaele në Romë, ky zhvillim përfaqëson një hap shumë të rëndësishëm në luftën kundër sëmundjes së Parkinsonit.
Ai thekson se, ndonëse sot ekzistojnë medikamente shumë të mira për kontrollimin e simptomave, asnjë prej tyre nuk arrin të ndalojë përparimin gradual të kësaj sëmundjeje. Për këtë arsye, terapia e re sjell shpresë për një trajtim më efektiv, që në teori mund të zvogëlojë ndjeshëm, madje pothuajse ta eliminojë këtë sëmundje neurodegjenerative.
