Kryeministri dhe njëkohësisht kryetari i Partisë Socialiste, Edi Rama, u ka kërkuar deputetëve, ministrave dhe drejtuesve politikë të nisin takime intensive me qytetarët në të gjitha bashkitë e vendit, në kuadër të turit “Punët e Shqipërisë”.
Ky tur do të zgjasë 9 javë dhe do të përmbyllet më 12 qershor, në 35-vjetorin e Partia Socialiste e Shqipërisë, ndërsa fokusi i takimeve do të jetë integrimi europian, ekonomia dhe politikat qeveritare.
Por theksi kryesor i mesazhit të Ramës ka qenë ndalimi i punësimeve nepotike në administratë. Sipas burimeve nga takimi me dyer të mbyllura, ai u ka kërkuar bashkive që të ndërpresin praktikat e favorizimit familjar dhe të ndërtojnë një administratë mbi meritën.
Në të njëjtën linjë, është kërkuar edhe hartimi i një plani të qartë për procesin e legalizimeve, ndërsa janë ngritur shqetësime për çështjet e pronave dhe përmbylljen e hartave digjitale.
Paralelisht, kryebashkiakët e majtë do të zhvillojnë takime me qytetarët për të raportuar mbi premtimet dhe realizimet, përpara se të kërkojnë një mandat të ri në zgjedhjet vendore.
Në takim, Rama ka kërkuar gjithashtu angazhim më të lartë të strukturave politike në komunikim publik, si në media ashtu edhe në rrjetet sociale. /skyweb.al
