Qeveria po ndërhyn në ligjin për kontabilitetin dhe pasqyrat financiare, duke propozuar një paketë ndryshimesh që synojnë rritjen e transparencës për kompanitë e mëdha dhe uljen e barrës administrative për bizneset e vogla.
Një nga risitë kryesore është detyrimi për raportim të zgjeruar për korporatat e mëdha, të cilat do të duhet të publikojnë jo vetëm të dhënat financiare, por edhe ndikimin e tyre në mjedis, çështjet sociale dhe praktikat e qeverisjes. Ky raportim përfshin edhe elementë si korrupsioni, zinxhiri i furnizimit dhe ndikimet në shoqëri.
Në të njëjtën kohë, projektligji vendos detyrimin që kompanitë shumëkombëshe të raportojnë se ku krijohet fitimi dhe ku paguhen taksat, në një përpjekje për të rritur transparencën fiskale dhe për të kufizuar shmangien e tatimeve.
Megjithatë, këto kërkesa të reja prekin vetëm një numër shumë të kufizuar subjektesh. Sipas përcaktimeve, detyrimi zbatohet për kompani me mbi 1000 punonjës dhe mbi 450 milionë euro të ardhura, çka në praktikë përkthehet në vetëm pak njësi ekonomike në Shqipëri.
Paralelisht, ligji synon të lehtësojë bizneset e vogla dhe të mesme. Këto subjekte nuk do të përballen me kërkesa shtesë për raportim dhe, në disa raste, do të kenë të drejtën të refuzojnë dhënien e informacionit që tejkalon standardet minimale në marrëdhëniet me partnerët më të mëdhenj.
Ndryshimet prekin edhe mënyrën e administrimit të dokumentacionit financiar. Afati minimal për ruajtjen e dokumenteve ulet nga 10 në të paktën 5 vite, duke reduktuar kostot dhe ngarkesën administrative për bizneset.
Një tjetër element i rëndësishëm lidhet me rritjen e transparencës brenda kompanive. Subjektet do të duhet të japin më shumë informacion në pasqyrat financiare, përfshirë kreditë dhe përfitimet e dhëna drejtuesve, detyrimet afatgjata dhe strukturën e të ardhurave sipas aktivitetit ekonomik.
Sipas relacionit shpjegues, ndryshimet synojnë përafrimin e legjislacionit shqiptar me direktivat e Bashkimit Europian dhe përmirësimin e cilësisë së raportimit financiar, me qëllim rritjen e besimit të investitorëve dhe forcimin e tregut.
Projektligji përbën një nga ndërhyrjet më të rëndësishme në fushën e kontabilitetit në vitet e fundit, duke vendosur një model të ri balancimi mes transparencës për korporatat e mëdha dhe lehtësimit për bizneset më të vogla. /skyweb,ak
