Njësia e Antiterrorit në Policinë e Shtetit po rrit kapacitetet e saj operacionale përmes përdorimit të dronëve të avancuar të prodhimit amerikan.
Lajmi është bërë i ditur nga Ambasada Amerikane në Tiranë, e cila thekson se këto pajisje moderne, të pajisura me teknologji imazhesh termike, do të përmirësojnë ndjeshëm aftësinë e forcave të rendit për mbikëqyrje të pandërprerë, si gjatë ditës ashtu edhe natës. Qëllimi është forcimi i sigurisë kufitare dhe identifikimi më i shpejtë i elementëve të rrezikshëm.
Sipas njoftimit, dronët e rinj do t’i mundësojnë Policisë së Shtetit monitorim më efikas të situatave në terren, duke rritur reagimin ndaj kërcënimeve dhe duke përmirësuar ndjekjen e individëve të përfshirë në akte dhune.
“Njësia e Antiterrorit në Policinë e Shtetit po pajiset me dronët më të fundit të prodhimit amerikan. Me teknologjinë e imazheve termike, këta dronë mund të rrisin aftësinë e Policisë së Shtetit në monitorimin e situatave ditë e natë për të mbrojtur kufijtë dhe për të gjurmuar elementët e dhunshëm”, njofton ambasada amerikane. /skyweb.al
