Skyweb.al paralajmëroi një ditë më parë se operacioni ndaj rrjeteve të call center-ave të paligjshme ishte sabotuar nga brenda pasi “bosat” e strukturave që kishin zhvatur europianët prej vitesh ishin njoftuar dhe larguar nga vendi.
Vetëm pak orë më pas, zhvillimet në Policinë e Shtetit duket se konfirmojnë këtë alarm, pasi sipas Infonews.al është larguar nga detyra i shefit të Krimit Ekonomik në Tiranë, Kreshnik Alimadhi.
Vendimi është marrë fill pas një aksioni të gjerë kundër aktiviteteve të paligjshme të call center-ave, që dyshohet se operonin me skema mashtrimi ndërkombëtar.
Burime zyrtare bëjnë me dije se lëvizja justifikohet si pjesë e një ristrukturimi të brendshëm, pas evidentimit të problematikave serioze në luftën ndaj krimit ekonomik. Megjithatë, koha kur vjen ky vendim dhe përmasat e operacionit hedhin dyshime të forta se bëhet fjalë për pasoja direkte të dështimeve apo ndërhyrjeve në këtë aksion.
Ende nuk dihet se çfarë funksioni do të ketë më tej Kreshnik Alimadhi pas largimit nga posti kyç që mbante në hetimin e krimeve ekonomike, ndërkohë që burime nga terreni flasin për tlëvizje të tjera të mundshme brenda strukturave të policisë pas marrjes së drejtimit nga Skënder Hita.
Operacioni ndaj call center-ave konsiderohet ndër më të mëdhenjtë e viteve të fundit, duke përfshirë dhjetëra subjekte dhe persona të dyshuar për mashtrim të qytetarëve europianë përmes skemave të investimeve fiktive.
Ky aksion ka vënë në lëvizje jo vetëm strukturat hetimore, por edhe nivelet më të larta drejtuese të Policisë së Shtetit. /skyweb.al
