Ministri i Turizmit, Kulturës dhe Sportit, Blendi Gonxhja, njoftoi se gjatë 24 orëve të fundit në Saranda kanë mbërritur mbi 2,300 turistë.
Në portin e qytetit u ankoruan kroçerat Sapphire Princess me 1,964 pasagjerë dhe Europa me 349 pasagjerë. Vizitorët e tyre pritet të eksplorojnë bukuritë natyrore dhe pasurinë historike të jugut të vendit.
“Sapphire Princess” është kthyer sërish në brigjet e Sarandës, duke konfirmuar popullaritetin e saj si një nga kroçerat më të frekuentuara në këtë destinacion. Anija mbërriti në orët e para të mëngjesit, duke tërhequr vëmendjen e banorëve dhe turistëve.
Sipas një njoftimi të Portit Detar Sarandë në rrjetet sociale, rikthimi i vazhdueshëm i kësaj kroçere tregon rritjen e besimit të kompanive ndërkombëtare të lundrimit ndaj Sarandës si një pikë e rëndësishme turistike në rajon.
Ndërkohë, autoritetet portuale dhe institucionet përgjegjëse kanë marrë të gjitha masat për të garantuar një pritje të organizuar dhe një përvojë sa më pozitive për vizitorët gjatë qëndrimit të tyre në qytet. /Skyweb.al
