Ministria e Mbrojtjes ka publikuar më 14 prill 2026 njoftimin për anulimin e një procedure të kufizuar prokurimi, të klasifikuar në nivelin “konfidencial”, në fushën e mbrojtjes dhe sigurisë.
Procedura ishte hapur më 3 nëntor 2025 dhe kishte si objekt “ndërtimin e infrastrukturës së bazës ajrore Kuçovë”, që përfshin ndërtimin e rrugës perimetrale, një nënkalim dhe rrjetin e fibrës optike, me vendndodhje në Kuçovë.
Fondi limit i këtij tenderi ishte 731,994,696 lekë pa TVSH, ose rreth 7.6 milionë euro, duke e renditur atë ndër procedurat me vlerë më të lartë në sektorin e mbrojtjes.
Në dokumentin zyrtar, Ministria e Mbrojtjes sqaron se anulimi është bërë në përputhje me legjislacionin në fuqi për prokurimet në fushën e mbrojtjes dhe sigurisë.
EKSKLUZIVE/ Përplasja me Ramën, firma e munguar në marrëveshjen e armëve që shkarkoi Piro Vëngun
Sipas arsyetimit, procedura është ndërprerë për shkak të rrethanave që kanë dalë jashtë kontrollit të autoritetit kontraktor dhe që nuk kanë qenë të parashikueshme në momentin e nisjes së saj.
Ministria thekson se vendimi është marrë duke respektuar parimet e barazisë dhe transparencës, të përcaktuara me vendim të Këshillit të Ministrave. /skyweb.al
