Bordi i Transparencës vendosi të rrisë sot çmimin e naftës në vend, duke e çuar sërish në 210 lekë nga 207 lekë që ishte më parë.
Vendimi erdhi pasi në bursa Gazoil (FOB- pa kosto sigurimi e transport) arriti në rreth 1320 $ / TON ditën e djeshme, çmim i cili reflektohet sot nga Dogana.
Por, gjatë ditës së sotme, nafta në bursa shënoi një ulje të fortë, pasi Irani deklaroi se kalimi i anijeve tregtare nëpër Ngushticën e Hormuzit do të jetë “plotësisht i hapur” gjatë periudhës së armëpushimit në Liban, duke zbutur frikën e tregjeve për ndërprerje të furnizimit në një nga korridoret më të rëndësishme energjetike në botë.
Treguesi Platts zbriti sot në rreth 1020 dollarë, me një tkurrje të ndjeshme nga dita e mëparshme. Por, sa do të reflektohet kjo në tregun e brendshëm.
Që prej datës 26 mars, çmimet e naftës në vend vendosen nga Bordi i Transparencës, që vendos çmimet sipas një formule të posaçme. Bordi i referohet të dhënave të dërguara nga Dogana lidhur me mbylljen e bursës Platts të datës së mëparshme. Këtij çmimi i shtohet një Premio 30$/ton sipas publikimit të Doganave.
Më pas shtohen taksat kryesore Qarkullimi (27 lekë për litër), akciza (39.4 lekë për litër nëse çmimi final është nën 220 lekë për litër dhe 31.5 lekë nëse çmimi kalon 220, që është zbatuar vetëm 5 ditë gjithsej lekë) karboni (3 lekë për litër) dhe mbi të gjitha këto llogaritet dhe TVSH prej 20%.
Këtyre u shtohen dhe 3 lekë marzh për shumicën e 12 lekë për pakicën, ku përfshihen gjithë kostot e tjera, si pagat, taksat lokale, transporti etj. (shiko tabelën në fund për formulën e çmimit).
Nëse Platts në Bursë zbret në rreth 1000 dollarë, atëherë, sipas formulës së Bordit, çmimi me pakicë i naftës duhet të ulet në rreth 185 lekë për litër (shiko tabelën në fund), me një zbritje prej rreth 30 lekësh për litër. Në dogana, çmimi i ri i Platts reflektohet të shtunën ose të hënën.
Që nga fillimi i aktivitetit, Bordi i Transparencës nuk ka arritur të mbajë nën kontroll çmimin e naftës, por vetëm sa ka shkaktuar luhatje nga një ditë në tjetrën, siç e tregon dhe grafiku.
Ndërkohë, Shqipëria vijon të ketë jo vetëm naftën më të shtrenjtë në rajon (30-40% më shumë), por hyn në 10 vendet më të shtrenjta në botë (e nënta), sipas të dhënave të fundit të Global Petrol Price, që i referohet datës 13 prill.
Barra e lartë e taksave, që arrijnë në gati gjysmën e çmimit është arsyeja kryesore që konsumatorët e varfër shqiptarë e paguajnë naftën kaq shtrenjtë, ndërkohë q buxheti ka arkëtuar në mars rreth 3.3 milionë euro më shumë TVSH vetëm nga shtrenjtimi i çmimit.
Burimi: Tregu, Bordi pas datës 26 shkurt
