Hetimet e SPAK për aferën e AKSHI-t po zgjerojnë fokusin përtej rrjedhës së parave, duke u përqendruar te mënyra se si janë përfituar dhe regjistruar pasuritë në emër të Ergys Agasi.
Në qendër të hetimeve janë ndërhyrjet në sistemin kadastral dhe zhdukja e sipërfaqeve të tëra toke nga regjistrat zyrtarë, për t’u rikthyer më pas në pronësi private përmes procedurave joligjore.
Gazetarja Klodiana Lala theksoi në Opinion se në dosje përmenden raste ku parcela të caktuara janë “fshirë nga zërat e mëparshëm kadastralë”, ndërsa në vitin 2024 nuk është zbatuar një vendim i Gjykatës së Lartë për këto prona.
Në planin hetimor, dyshimet lidhen me ndërtimin e vilave në sipërfaqe që rezultojnë të kenë kaluar në mënyrë të paligjshme, si dhe me privatizimin e tokave shtetërore brenda një projekti turistik ku parashikoheshin ndërtime elitare.
Në këtë skemë përmendet edhe roli i Dallandyshe Bici, e dyshuar për ndërhyrje në proceset e legalizimit dhe kalimit të pronave në favor të personave nën hetim.
Zhvillimet e fundit lidhen me një operacion të Policia e Shtetit në ambientet e “Equos Resort”, ku u ekzekutua vendimi për sekuestrimin e pasurive të Agasit.
Në fokus janë disa vila dhe ambiente të tjera të kompleksit, të cilat dyshohet se janë legalizuar në kundërshtim me ligjin dhe janë kaluar në emër të tij gjatë një administrimi “de facto” të resortit përmes personave të tij të besuar.
Sipas burimeve hetimore, skema dyshohet të ketë përfshirë edhe kalimin në pronësi të dhjetëra mijëra metrave katrorë tokë pyll përreth kompleksit, etimet kanë evidentuar mungesë ndërhyrjeje nga Inspektorati Kombëtar i Mbrojtjes së Territorit, çka ka bërë të mundur vijimin e punimeve pa pengesa.
Paralelisht, vendimi i Gjykatës së Posaçme ka çuar në sekuestrimin e një portofoli të gjerë pasurish në emër të Agasit, Mirlinda Karçanaj dhe Ermal Beqiri. Në listë përfshihen prona të shumta në Tiranë, Durrës dhe Vlorë, që variojnë nga toka pyjore dhe truall, deri te vila, apartamente, automjete luksoze, një jaht dhe llogari bankare.
Operacioni te “Equos Resort” ndaj pronave të Ergys Agasit sinjalizon një fazë tjetër të hetimit, ku përveç ndjekjes së burimit të fondeve, po verifikohet edhe legjitimiteti i pronësisë dhe mënyra se si këto pasuri janë regjistruar.
Dyshimet për manipulim të të dhënave kadastrale dhe zhdukje të pronave nga regjistrat zyrtarë pritet të jenë një nga drejtimet kryesore të hetimit në vijim./skyweb.al
