Eksportet e kompanive shqiptare drejt botës mbetën në stanjacion, ndërsa tani ekonomia po shfaq dhe një problem tjetër; atë të uljes së importeve.
Instituti i Statistikave raportoi se për pesë muajt e parë të vitit, Shqipëria eksportoi rreth 168 miliardë lekë mallra në tregjet ndërkombëtare, me një rritje prej më pak 2.1 për qind krahasuar me të njëjtën periudhë të vitit të kaluar.
Përveçse një rritje e papërfillshme, ajo vjen mbi një bazë të ulët. Kjo pasi viti i kaluar ishte shënoi nivelin më të ulët të eksporteve që nga pandemia. Sipas të dhënave të INSTAT, në vitin 2024 eksportet totale të mallrave nga Shqipëria rezultuan 373 miliardë lekë ose 114 miliardë lekë më pak se sa në vitin 2022.
Eksportet e Shqipërisë në tregjet ndërkombëtare u goditën fort nga kursi i këmbimit, por edhe rritja e kostove për prodhuesit vendas duke rënë për dy vjet rresht 2023-2024. Pas kësaj rënie të fortë, eksportet duket se janë stabilizuar në gropën e krizës, pa fuqi për t’u rimëkëmbur sërish.
Por përtej rënies dramatike të eksporteve, ekonomia shqiptare po përballet tani më një problem të ri. Kjo është rënia e importit, veçanërisht në produktet më kritike për zhvillimin ekonomik.
Të dhënat zyrtare nga INSTAT tregojnë se për pesë muajt e parë të vitit, importet totale u ulën me gati 10 miliardë lekë ose 100 milionë euro dhe e gjithë rënia erdhi nga importi i makineri-pajisjeve.
Pra, bizneset shqiptare po blejnë më pak makineri, pajisje dhe teknologji nga jashtë, produkte këto të lidhura direkt me ecurinë e investimeve në ekonominë kombëtare. Mbetet për t’u parë nëse kjo rënie e importeve të makinerive është e lidhur me periudhën zgjedhore, gjatë së cilës, bizneset përgjithësisht rrijnë pasiv dhe shtyjnë planet e investimeve.
Megjithatë përtej investimeve, ecuria e importeve këtë vit edhe në zërat e tjerë të produkteve sinjalizon një prirje shqetësuese. Atë të ngadalësimit të konsumit ose stanjacionit të tij, në kushtet kur ulja e importeve nuk është shoqëruar nga prodhimi vendas, i cili në segmente të tëra të ekonomisë si bujqësia dhe industria vazhdon të tkurret me ritme të ndjeshme. /kapitali
