Tregu i pasurive të paluajtshme në Shqipëri po hyn në një fazë të re zhvillimi, ku rritja e çmimeve në Tiranë po shfaq shenja frenimi, ndërsa zonat bregdetare po regjistrojnë rritje më të shpejtë dhe po marrin rolin kryesor në treg.
Sipas Raportit të Stabilitetit Financiar të Bankës së Shqipërisë, indeksi i çmimeve të banesave është rritur me 11.7% në gjashtëmujor dhe me 28% në terma vjetorë, por kjo rritje nuk është e shpërndarë njëtrajtshëm në të gjithë vendin .
Raporti thekson se Tirana ka shfaqur lëvizje më të moderuara të çmimeve, ndërsa kontributin kryesor në rritjen e përgjithshme e ka dhënë bregdeti, ku kërkesa vijon të jetë e lartë dhe çmimet po rriten më shpejt .
Një nga faktorët që po shtyn këtë trend është rritja e interesit nga blerësit e huaj. Pesha e transaksioneve nga jorezidentët ka shënuar rritje, duke ushtruar presion të drejtpërdrejtë mbi çmimet, sidomos në zonat turistike .
Në të njëjtën kohë, tregu karakterizohet nga një kërkesë e qëndrueshme. Numri i pronave të pashitura ka rënë dhe koha mesatare e shitjes është shkurtuar, duke treguar një ritëm më të shpejtë qarkullimi të pronave .
Rritja e kredisë për pasuri të paluajtshme ka qenë një tjetër faktor që ka mbështetur këtë zhvillim, ndërsa edhe çmimet e qirave kanë vijuar trendin rritës, duke reflektuar presionin e përgjithshëm në treg .
Në këto kushte, tregu i pronave po shfaq një ndarje të qartë: Tirana po hyn në një fazë stabilizimi relativ, ndërsa bregdeti po shndërrohet në epiqendrën e re të rritjes së çmimeve, i nxitur nga turizmi dhe kërkesa ndërkombëtare. /skyweb.al
