Tregu i pronave luksoze në Europë ka shënuar rritje gjatë vitit 2025, me qytete të ndryshme që kanë përfituar nga kërkesa e lartë për pasuri të nivelit të lartë, ndërsa disa qendra tradicionale si Londra kanë hyrë në fazë rënieje.
Sipas raportit “Wealth Report 2026” të kompanisë Knight Frank, në më shumë se gjysmën e rreth 50 qyteteve të analizuara në Europë, çmimet e pronave luksoze janë rritur mbi 3% në baza vjetore.
Në krye të listës renditet Prague, e cila ka shënuar rritjen më të lartë në kontinent, me 14.6% gjatë vitit 2025.
Pas saj vijnë destinacione turistike dhe rezidenciale si Méribel me 9%, Porto me 8.5% dhe Marbella me 8.1%.
Rritje të ndjeshme kanë shënuar edhe Courchevel me 6.9%, Firence me 6.7% dhe zona e Comos me 6.5%. Në të njëjtin trend janë edhe Roma dhe Gstaad, me rritje mbi 5%.
Raporti thekson se destinacionet turistike dhe resortet, veçanërisht ato alpine dhe bregdetare, janë fituesit kryesorë në Europë, ndërsa qytetet financiare tradicionale po mbeten pas.
Në kontrast të fortë, London ka shënuar rënien më të madhe në Europë, me një ulje prej 4.7% të çmimeve të pronave luksoze. Sipas raportit, ndryshimet në politikat fiskale për individët e pasur kanë ndikuar në uljen e kërkesës dhe në orientimin drejt qirave.
Rënie më të lehta janë regjistruar edhe në Ibiza, Jersey dhe Luzerna, ndërsa qytete të tjera europiane si Madridi, Oslo dhe Berlini kanë shënuar rritje solide.
Në nivel global, dallimi më i madh vjen nga Tokio, ku çmimet e pronave luksoze janë rritur me 58.5% gjatë vitit 2025, duke e bërë atë tregun më dinamik në botë. Pas tij renditet Dubai me një rritje prej 25.1%.
Ndërkohë, rëniet më të forta janë regjistruar në qytetet kineze si Guangzhou, si dhe në tregje si Toronto dhe Vancouver.
Raporti vëren se tregu i pronave luksoze po shkëputet gjithnjë e më shumë nga tregu i përgjithshëm i banesave, i mbështetur nga rritja e pasurisë globale, ndërsa kërkesa mbetet më rezistente ndaj presioneve ekonomike. /skyweb.al
