Grupi hungarez 4iG po sheh Shqipërinë si një pikë të rëndësishme për zhvillimin e infrastrukturës digjitale në rajon, me plane që përfshijnë ndërtimin e qendrave të të dhënave, kabllo nënujorë dhe lidhje të reja me fibra optike drejt Greqisë dhe rrjeteve evropiane.
Kryeministri Edi Rama priti në Tiranë biznesmenin hungarez Gellért Jászai, aksionerin kryesor të 4iG, grupi që në Shqipëri zotëron kompaninë One Albania. Takimi u bë publik nga vetë Jászai përmes një postimi në rrjetin X, ku ai njoftoi se me Ramën diskutoi vizionin afatgjatë të 4iG në Shqipëri dhe ambiciet strategjike të kompanisë në rajon.
“Ishte një nder i madh të takohesha përsëri me Kryeministrin Edi Rama në Tiranë për të diskutuar vizionin afatgjatë dhe ambiciet strategjike të 4iG Nyrt. në Shqipëri”, shkroi Jászai.
Një nga temat kryesore të takimit ishte mundësia e investimeve në qendra të të dhënave në Shqipëri, një sektor që po rritet me shpejtësi për shkak të kërkesës së madhe për ruajtje, përpunim dhe transmetim të të dhënave, sidomos pas zhvillimit të inteligjencës artificiale.
“Ne shqyrtuam mundësitë e ardhshme në lidhje me investimet në qendrat e të dhënave në Shqipëri, të cilat formojnë një shtyllë të rëndësishme të strategjisë sonë më të gjerë rajonale të infrastrukturës digjitale”, njoftoi Jászai.
Krahas qendrave të të dhënave, në takim u diskutua edhe projekti i kabllit nënujor EAGLE, i planifikuar për të lidhur Egjiptin me Shqipërinë. Sipas biznesmenit hungarez, ky projekt synon të krijojë një urë digjitale mes Afrikës së Veriut, Lindjes së Mesme, Ballkanit Perëndimor dhe Evropës.
“Diskutimet tona mbuluan gjithashtu projektin e kabllit nënujor EAGLE të planifikuar midis Egjiptit dhe Shqipërisë, një iniciativë strategjikisht e rëndësishme për lidhjen e të dhënave në Mesdhe”, shkroi ai.
Takimi vjen pak ditë pas një tjetër zhvillimi të rëndësishëm për planet e 4iG në rajon.
Kompania 4iG International Digital Infrastructure Zrt. dhe Grid Telecom kanë nënshkruar një memorandum mirëkuptimi për të eksploruar ndërtimin e një korridori të ri digjital që lidh Shqipërinë me Greqinë dhe më tej me rrjetet evropiane e ndërkombëtare.
Në qendër të këtij bashkëpunimi është ndërtimi i një linje tokësore me fibra optike me kapacitet të lartë mes Shqipërisë dhe Greqisë. Projekti synon të krijojë një korridor të qëndrueshëm digjital, që lidh rrjetet e dy kompanive dhe forcon lidhjen ndërkufitare nga Mesdheu drejt pikave kryesore të lidhjes në Evropë.
Marrëveshja hap rrugën edhe për bashkëpunim me partnerë të tjerë strategjikë për zhvillimin e një sistemi të ri kabllor nënujor me fibra optike në Adriatik dhe Mesdhe. Ky projekt do të përfshinte projektimin, ndërtimin, operimin dhe shfrytëzimin tregtar të një infrastrukture të re me kapacitet të lartë transmetimi.
Planet e 4iG për qendra të të dhënave, kabllo nënujorë dhe korridore me fibra optike tregojnë se grupi hungarez po synon ta pozicionojë Shqipërinë si nyje të rëndësishme të infrastrukturës digjitale rajonale.
Kur këto projekte konkretizohen, Shqipëria do të marrë një rol më të madh në lidhjen mes Mesdheut, Ballkanit, Lindjes së Mesme dhe Evropës, jo vetëm si treg telekomunikacioni, por edhe si pikë strategjike për ruajtjen dhe qarkullimin e të dhënave. /skyweb.al
