Gjermania do të dislokojë një bateri të mbrojtjes ajrore “Patriot” në Turqi, në kuadër të një rotacioni të forcave të NATO-s, duke zëvendësuar një njësi amerikane, njoftoi Ministria gjermane e Mbrojtjes.
Sipas ministrisë, rreth 150 ushtarakë gjermanë, aktualisht të stacionuar në Husum në veri të Gjermanisë, do të dërgohen në Turqi së bashku me një bateri “Patriot”, nga fundi i qershorit deri në shtator.
Ministri gjerman i Mbrojtjes, Boris Pistorius, deklaroi se “Gjermania po merr më shumë përgjegjësi brenda NATO-s”, duke theksuar se bashkëpunimi i përbashkët me ushtarët turq dhe amerikanë tregon besueshmërinë e aleancës.
Sistemi “Patriot” është një sistem i lëvizshëm i mbrojtjes ajrore, i projektuar për të interceptuar raketa lundruese, raketa balistike dhe avionë.
Sipas njoftimeve, njësia amerikane që do të zëvendësohet kishte qenë e vendosur në Turqi për të forcuar mbrojtjen ajrore të vendit në një periudhë tensionesh rajonale dhe kërcënimesh me raketa.
Forcat e NATO-s në rajon kanë ndërhyrë disa herë për të interceptuar raketa balistike që konsideroheshin si kërcënim për territorin turk.
Gjermania ka pasur më parë të dislokuar sisteme “Patriot” në Turqi edhe gjatë periudhës 2013–2015, me qëllim mbrojtjen e kufirit të vendit nga pasojat e konfliktit në Siri. /skyweb.al
