Komuna e Ulqinit ka miratuar një rregullore të re që kufizon lëvizjen me rroba plazhi jashtë zonave bregdetare, në prag të sezonit turistik veror.
Sipas vendimit të miratuar nga Kuvendi i Ulqinit, qytetarët dhe turistët nuk do të lejohen të qarkullojnë me bikini apo pjesërisht të zhveshur në rrugë, sheshe, parqe, shëtitore dhe hapësira të tjera publike të qytetit.
Rregullorja nuk prek zonat e plazhit dhe hapësirat pranë bregdetit, të cilat janë të dedikuara për pushuesit. Kufizimi vlen për pjesët urbane të qytetit, ku autoritetet kërkojnë të vendosin një standard më të qartë sjelljeje gjatë sezonit.
Për personat që nuk respektojnë rregulloren janë parashikuar gjoba të konsiderueshme. Sipas autoriteteve vendase, penalitetet për personat fizikë variojnë nga 350 deri në 500 euro.
Zyrtarët e Ulqinit thonë se masa synon të ruajë rendin publik, etikën dhe imazhin e qytetit si destinacion turistik. Vendimi vjen në një periudhë kur Ulqini pret një fluks të lartë vizitorësh, sidomos gjatë muajve të verës.
Me këtë rregullore, autoritetet lokale kërkojnë të ndajnë më qartë hapësirat e plazhit nga zonat publike të qytetit, duke u kërkuar pushuesve që jashtë bregdetit të respektojnë rregullat e veshjes në ambiente urbane. /skyweb.al
