Dy çisterna kineze të ngarkuara me naftë dolën nga Ngushtica e Hormuzit të mërkurën, sipas të dhënave të transportit detar, duke rritur shpresat se konflikti SHBA-Izrael me Iranin mund të zgjidhet së shpejti pas komenteve pozitive nga presidenti amerikan dhe zëvendësi i tij, raporton Reuters.
Presidenti Donald Trump tha të martën se lufta do të përfundonte “shumë shpejt”, ndërsa zëvendëspresidenti JD Vance foli për përparim në bisedimet me Teheranin për një marrëveshje që do t’i jepte fund armiqësive.
“Jemi në një pozicion mjaft të mirë këtu”, tha Vance gjatë një konference për shtyp në Shtëpinë e Bardhë.
Trump i bëri komentet një ditë pasi deklaroi se kishte pezulluar një rifillim të planifikuar të luftimeve, pas një propozimi të ri nga Teherani për t’i dhënë fund konfliktit.
“Isha një orë larg marrjes së vendimit për të vepruar sot”, u tha Trump gazetarëve në Shtëpinë e Bardhë të martën.
Sipas tij, udhëheqësit iranianë po “luten për një marrëveshje”, duke shtuar se një sulm i ri amerikan do të ndodhte në ditët në vijim nëse nuk arrihej një marrëveshje.
Shtetet e Bashkuara kanë hasur vështirësi për t’i dhënë fund luftës që nisën bashkë me Izraelin gati tre muaj më parë. Trump ka deklaruar vazhdimisht gjatë konfliktit se një marrëveshje me Teheranin ishte afër, ndërsa ka kërcënuar gjithashtu me sulme të rënda ndaj Iranit nëse nuk arrihej një akord.
Presidenti amerikan ndodhet nën presion të madh politik brenda vendit për të arritur një marrëveshje që do të rihapte Ngushticën e Hormuzit – një rrugë kyçe për furnizimet globale me naftë dhe mallra të tjera. Çmimet e benzinës mbeten të larta dhe popullariteti i Trump ka rënë ndjeshëm, ndërsa zgjedhjet për Kongresin afrohen në nëntor./skyweb.al
