Infeksionet bakteriale seksualisht të transmetueshme (IST), si sifilizi dhe gonorrea, po arrijnë nivele rekord në Europë, sipas të dhënave të reja Qendra Europiane për Parandalimin dhe Kontrollin e Sëmundjeve.
Sipas raportit, rastet e gonorresë arritën mbi 106 mijë në vitin 2024, një rritje prej 303% krahasuar me vitin 2015. Edhe sifilizi është më shumë se dyfishuar, ndërsa klamidia mbetet IST-ja më e raportuar me mbi 213 mijë raste.
ECDC paralajmëron se këto infeksione, nëse nuk trajtohen, mund të shkaktojnë infertilitet, dhimbje kronike dhe probleme serioze me zemrën ose sistemin nervor.
Gonorrea po përhapet veçanërisht tek meshkujt 25–34 vjeç, ndërsa rastet tek gratë e reja mbeten shqetësuese për shkak të rrezikut ndaj shëndetit riprodhues.
Gjithashtu është rritur ndjeshëm edhe sifilizi kongjenital, që transmetohet nga nëna tek fetusi gjatë shtatzënisë. Sipas raportit, kjo sëmundje mund të parandalohet plotësisht me diagnostikim dhe trajtim në kohë. /skyweb.al
