Qeveria ka propozuar ndryshime në ligjin për menaxhimin e kimikateve, me fokus uljen e barrës administrative për bizneset që operojnë në këtë sektor. Ndryshimi kryesor lidhet me heqjen e kërkesës për licencim për disa veprimtari që kanë të bëjnë me kimikatet e rrezikshme, pasi kjo licencë është vlerësuar si pengesë për tregtinë.
Projektligji “Për disa shtesa dhe ndryshime në ligjin për menaxhimin e kimikateve” synon thjeshtimin e procedurave administrative, shmangien e mbivendosjes së kompetencave mes institucioneve dhe përafrimin gradual me praktikat e Bashkimit Evropian në këtë fushë.
Sipas relacionit që shoqëron projektligjin, Ministria e Ekonomisë dhe Inovacionit, në kuadër të Kapitullit 1 “Lëvizja e lirë e mallrave”, ka analizuar legjislacionin vendas që rregullon tregtimin e produkteve dhe ka identifikuar dispozita që mund të konsiderohen barriera tregtare.
Në këtë analizë është përfshirë edhe fusha e kimikateve. Licenca për prodhimin, vendosjen në treg, depozitimin dhe ruajtjen e kimikateve të rrezikshme është vlerësuar si masë me efekt të njëjtë me kufizimet sasiore në import dhe eksport. Për këtë arsye, ajo propozohet të shfuqizohet.
Në praktikë, kjo do të thotë se subjektet që merren me veprimtari të tilla nuk do t’i nënshtrohen më këtij regjimi licencimi, për aq sa kjo nuk kërkohet nga legjislacion tjetër specifik. Qeveria e argumenton këtë ndërhyrje me nevojën për të reduktuar barrën administrative ndaj operatorëve ekonomikë dhe për të shmangur procedurat e tepërta që pengojnë lëvizjen e lirë të mallrave.
Projektligji ndryshon nenin 6 të ligjit ekzistues, duke përcaktuar se ministria përgjegjëse për tregtinë do të jetë autoriteti kompetent për kontrollin në treg të kimikateve. Ndërkohë, hiqet roli i ministrisë përgjegjëse për industrinë si autoritet kompetent për licencimin e veprimtarive që lidhen me kimikate të klasifikuara si të rrezikshme.
Pra, filozofia e re e ligjit zhvendoset nga licencimi paraprak drejt kontrollit në treg. Kjo nënkupton më pak procedura para nisjes së aktivitetit, por ruajtje të mekanizmave të mbikëqyrjes nga autoritetet përgjegjëse.
Si pasojë e heqjes së licencës, projektligji shfuqizon edhe dispozitat që lidhen me kontrollin e pajisjes me licencë dhe me masat administrative për mungesën e saj apo për shkeljen e kushteve të licencimit. Relacioni sqaron se këto kundërvajtje nuk janë më të aplikueshme, pasi regjimi i licencimit po hiqet nga ligji.
Ndryshimet nuk kufizohen vetëm te pjesa e licencave. Projektligji parashikon edhe një mekanizëm më të shpejtë për përditësimin e listave të substancave me rrezikshmëri shumë të lartë, të njohura si SVHC, dhe të substancave kandidate. Këto lista do të miratohen me urdhër të ministrit dhe do të përditësohen në përputhje me listat e Bashkimit Evropian.
Qeveria argumenton se kjo mënyrë e re miratimi do të lejojë reagim më të shpejtë ndaj ndryshimeve teknike që ndodhin në nivel evropian, pa qenë nevoja që çdo përditësim të kalojë në procedura më të gjata vendimmarrjeje.
Projektligji lidhet me procesin e integrimit evropian dhe me përgatitjen e kuadrit ligjor për Kapitullin 27 “Mjedisi dhe Ndryshimet Klimatike”, veçanërisht për nënkapitullin e kimikateve. Megjithatë, relacioni thekson se akti nuk bën përafrim të drejtpërdrejtë të acquis të BE-së në këtë fazë, por krijon bazë më fleksibël për përditësime të mëvonshme.
