Një segment spiral i shkallëve origjinale të Kullës Eiffel u shit për më shumë se 450 mijë euro në një ankand në Paris të enjten e kaluar, raporton Reuters.
Blerësi, i cili ndodhej në sallën e ankandit, u bë pronar i një pjese shkallësh me 14 hapa, rreth 2.7 metra e lartë, me peshë 1.4 ton dhe që daton nga viti 1889, viti kur u përfundua monumenti ikonë që ngrihet mbi qendrën e Parisit.
“Kur blen një pjesë të Kullës Eiffel, po blen një pjesë të Parisit, së bashku me gjithë imagjinatën dhe simbolikën që ajo përfaqëson”, tha Sabrina Dolla, drejtoreshë e dizajnit Art Deco në shtëpinë e ankandeve Artcurial Paris, ku u zhvillua shitja.
Më shumë se katër dekada më parë, një total prej 160 metrash shkallë u prenë në segmente më të vogla dhe u shitën, ndërsa u zëvendësuan nga ashensorët që sot transportojnë vizitorët drejt platformës më të lartë panoramike të Kullës Eiffel.
Segmenti i nxjerrë në ankand të enjten u shit për 450,160 euro (rreth 521,825 dollarë), trefishi i vlerës maksimale të parashikuar para shitjes, e cila llogaritej mes 120 mijë dhe 150 mijë eurove.
Në vitin 2008, një tjetër segment u shit tek një blerës privat amerikan për një shifër rekord prej 550 mijë eurosh. Pjesë të tjera të shkallëve të Kullës Eiffel, me gjatësi nga 3 deri në 9 metra, ruhen në vende prestigjioze në mbarë botën.
Disa segmente ndodhen pranë Statujës së Lirisë në Nju Jork, në kopshtet e Fondacionit Yoshi në Yamanashi të Japonisë, si edhe në koleksione private jashtë Francës.
Sipas Dolla-s, Lojërat Olimpike Paris 2024, ku monumente si Kulla Eiffel, Place de la Concorde dhe Grand Palais ishin në qendër të vëmendjes, kanë rritur interesin e koleksionistëve për kullën ikonike.
“Po shohim padyshim një interes të ri për simbolikën që ajo përfaqëson dhe për vlerën e saj estetike”, shtoi ajo. /skyweb.al
