Ryanair, kompania ajrore që shpesh është kritikuar për tarifat shtesë dhe politikat strikte ndaj pasagjerëve, ka arritur një rekord të rrallë në industrinë e aviacionit, duke shlyer të gjithë borxhin për flotën e saj të avionëve Boeing 737.
Sipas deklaratës së kompanisë, Ryanair ka paguar obligacionin e fundit me vlerë 1.2 miliardë euro dhe për herë të parë që prej vitit 1997 rezulton praktikisht pa borxhe.
Kompania deklaron se aktualisht operon me 620 avionë Boeing 737 të cilët i zotëron plotësisht, pa kredi apo garanci financiare mbi ta.
Ky konsiderohet një zhvillim i pazakontë në industrinë e aviacionit, ku shumica e kompanive mbështeten te kreditë afatgjata apo kontratat e leasing-ut për shkak të kostos shumë të lartë të avionëve komercialë.
Ryanair argumenton se pozicioni i ri financiar do ta ndihmojë të mbajë çmime më të ulëta se konkurrentët dhe të vazhdojë zgjerimin në tregun europian.
Drejtori ekzekutiv Michael O’Leary ka paralajmëruar më herët se disa kompani rivale mund të përballen me vështirësi gjatë sezonit veror.
Modeli i Ryanair ka qenë prej vitesh objekt debatesh për shkak të tarifave shtesë për bagazhet, zgjedhjen e vendeve apo shërbime të tjera, por rezultatet financiare tregojnë se strategjia e kostove të ulëta ka krijuar një nga kompanitë ajrore më të forta financiarisht në Europë./skyweb.al
