Artur Shehu ka reaguar për herë të parë publikisht lidhur me pronën prej qindra hektarësh në zonën e Nartës, ku është parashikuar zhvillimi i projektit turistik në Zvërnec, i cili ka shkaktuar protesta qytetare dhe debat të gjerë publik.
Në një lidhje direkte nga Miami në emisionin “Opinion” në Tv Klan, Shehu deklaroi se prona në fjalë është pronë e vjetër e fisit të tij dhe se nuk bëhet fjalë për një truall të marrë në mënyrë të dyshimtë.
Ai tha se sipërfaqja totale është rreth 460 hektarë, ndërsa aktualisht disponon certifikata pronësie për rreth 252 deri në 253 hektarë.
“Prona është e fisit Shehu dhe unë jam një nga pronarët. Pjesa më e madhe ka kaluar nga unë, sepse unë jam marrë me ta. Por prona është e gjithë farefisit”, u shpreh Shehu.
I pyetur nga Blendi Fevziu për mënyrën se si është fituar prona, Shehu tha se bëhet fjalë për pronë të vjetër, të njohur më pas përmes vendimeve të institucioneve shtetërore.
“Jam pronar i vjetër. Prona është blerë kohë më parë, pastaj me kthimin e komisionit, me të gjitha format e shtetit”, tha ai.
Shehu u pyet edhe për hetimet e SPAK, i cili ka bllokuar llogaritë e tij dhe po heton dyshimet për tjetërsim të paligjshëm të pronës. Ai u shpreh i qetë, duke thënë se organet e drejtësisë janë në të drejtën e tyre të bëjnë verifikime.
“SPAK ka punën e vet dhe le ta verifikojë. Nuk kam asnjë gjë me SPAK”, deklaroi Shehu.
Një tjetër pikë e debatit ishte lidhja e tij me investitorët e projektit në Zvërnec. Shehu mohoi të ketë pasur kontakte të drejtpërdrejta me ta dhe tha se nuk i njeh personalisht.
“Investitorët nuk i njoh fare, ka ndërmjetës. Nuk i njoh fare”, tha ai.
Deklaratat e Shehut vijnë në një moment kur projekti në Zvërnec është kthyer në një nga çështjet më të diskutuara publike, për shkak të kundërshtimeve të banorëve dhe aktivistëve që pretendojnë se investimi prek një zonë me rëndësi mjedisore.
Ndërkohë, çështja e pronësisë mbetet një nga pikat më të ndjeshme të debatit, pasi SPAK po verifikon ligjshmërinë e dokumenteve dhe procedurave që lidhen me truallin ku pritet të zhvillohet projekti.
