Hetimet për helmimin e 64 studentëve të Akademisë së Sigurisë vijojnë, ndërsa policia ka marrë në pyetje administratoren e kompanisë “Sori-Al”, Alma Tafani.
Kompania kishte kontratën për furnizimin me ushqim të studentëve të Akademisë së Sigurisë, ku dhjetëra prej tyre shfaqën probleme shëndetësore pas konsumimit të ushqimit.
Sipas dëshmisë së dhënë nga administratorja, kompania ka kryer çdo ditë furnizimin me ushqim për studentët në përputhje me detyrimet kontraktore.
Ajo ka deklaruar se çdo vakt është gatuar dhe më pas është shpërndarë sipas procedurave normale, duke respektuar kushtet e higjienës.
Në kuadër të hetimeve janë marrë në pyetje edhe kuzhinieri, punonjësit që përgatisin dhe ndajnë ushqimin në racione, stafi i shpërndarjes, si dhe studentët që u prekën nga helmimi.
Deri në këtë fazë të hetimit, asnjë person nuk është vendosur nën hetim në lidhje me ngjarjen.
Hetuesit po administrojnë provat dhe po kryejnë verifikimet e nevojshme për të përcaktuar shkaqet e helmimit dhe përgjegjësitë e mundshme.
Do të jetë Prokuroria ajo që do të vendosë nëse do të regjistrohen persona nën hetim për rastin që preku studentët e Akademisë së Sigurisë.
