Një nga ngjarjet astronomike më spektakolare të vitit pritet këtë të mërkurë, kur një eklips total i Diellit do të jetë i dukshëm nga disa zona të hemisferës veriore.
Mijëra njerëz kanë planifikuar udhëtime drejt Spanjës, Islandës dhe Grenlandës për të ndjekur momentin kur Hëna do të mbulojë plotësisht Diellin, duke e kthyer për disa minuta ditën në errësirë.
Në Shqipëri eklipsi nuk do të jetë total, por fenomeni do të mund të shihet pjesërisht. Në Tiranë, ai pritet të nisë rreth orës 19:31 dhe të arrijë maksimumin rreth orës 19:41, kur Hëna do të mbulojë afërsisht 19% të diskut të Diellit.
Fenomeni pritet të përfundojë rreth orës 19:44, vetëm pak minuta përpara perëndimit të Diellit.
Në zonat ku eklipsi do të jetë total mund të shihen disa fenomene që e bëjnë këtë ngjarje veçanërisht të rrallë. Një prej tyre është i ashtuquajturi “Efekti i Unazës me Diamant”, që shfaqet pak sekonda përpara ose pas mbulimit të plotë të Diellit.
Në atë moment, një rreze e vetme drite kalon mes relievit të Hënës, ndërsa korona diellore krijon pamjen e një unaze të ndritshme me një “diamant” në njërën anë.
Pak përpara eklipsit total mund të shfaqen edhe “Rruazat e Baily-t”, pika të vogla drite të krijuara kur rrezet e Diellit kalojnë mes maleve dhe luginave në sipërfaqen e Hënës.
Kulmi i spektaklit është shfaqja e koronës diellore, atmosfera e jashtme e Diellit, e cila normalisht nuk mund të shihet për shkak të shkëlqimit të tij. Gjatë totalitetit ajo shfaqet si një aureolë e bardhë rreth diskut të errët të Hënës.
Me syze të certifikuara për eklipset ose teleskopë të pajisur me filtra të posaçëm mund të dallohen edhe njollat diellore, zona më të errëta të sipërfaqes së Diellit që krijohen nga aktiviteti i fortë magnetik.
Eklipsi total do të jetë i dukshëm nga pjesë të Spanjës, Islandës, Grenlandës, Portugalisë, Rusisë, Kanadasë dhe SHBA-së, ndërsa në një pjesë më të madhe të Europës, përfshirë Tiranën, fenomeni do të shihet vetëm pjesërisht.
Vëzhgimi i Diellit nuk duhet bërë me sy të lirë. Për ndjekjen e eklipsit duhen përdorur vetëm syze të posaçme dhe të certifikuara për eklipset ose pajisje optike me filtra të përshtatshëm.
