Policia Kufitare e Sarandës ka bllokuar dy mjete lundruese Jet Ski, pasi u konstatuan duke lëvizur brenda perimetrit të sigurisë, në zona ku po laheshin pushuesit.
Rastet janë evidentuar gjatë kontrolleve dhe patrullimeve të shtuara përgjatë vijës bregdetare, me qëllim garantimin e sigurisë së pushuesve dhe zbatimin e rregullave të lundrimit.
Sipas Policisë, rasti i parë u konstatua në zonën e Gjirit të Sarandës, ku një Jet Ski kishte hyrë në hapësirën e përcaktuar për pushuesit, duke rrezikuar jetën dhe sigurinë e tyre.
Një tjetër mjet lundrues u konstatua në Gjirin e Ksamilit, po brenda perimetrit të sigurisë dhe në kundërshtim me rregullat e lundrimit.
Në përfundim të veprimeve administrative, të dy mjetet lundruese u shoqëruan dhe u bllokuan në Portin e Sarandës.
Ndaj poseduesve të tyre, shtetasve R. A. dhe R. P., Policia vendosi masa administrative me vlerë 500 mijë lekë të rinj për secilin.
Policia e Shtetit apelon ndaj përdoruesve të mjeteve lundruese dhe subjekteve që operojnë me to që të respektojnë perimetrat e sigurisë dhe të mos hyjnë në zonat e përcaktuara për pushuesit.
Gjatë sezonit turistik, kontrollet në vijën bregdetare pritet të vijojnë, veçanërisht në zonat me fluks të lartë pushuesish si Saranda dhe Ksamili.
