Kryeministri Edi Rama tregoi se një kryebashkiak i ishte ankuar për qytetarët që kishin dalë në protestë, edhe pse sipas tij bashkia u kishte rregulluar lagjen me rrugë, ndriçim, pemë dhe stola.
Gjatë eventit “Rilindja 2.0”, ku ishin të pranishëm edhe kryebashkiakët, Rama tha se ky lloj reagimi i qytetarëve nuk duhet lexuar si mosmirënjohje.
Në thelb, kryebashkiaku ishte ankuar se banorët nuk ia dinin për nder për shërbimet e bëra, ndonëse ato janë investime publike që kryhen me taksat e qytetarëve.
Rama tha se vendi ka hyrë në një fazë tjetër zhvillimi, ku qytetarët nuk kënaqen më vetëm me faktin që janë bërë disa punë bazë.
Sipas tij, sa më shumë përmirësohen kushtet, aq më shumë bien në sy mungesat e tjera.
“Njëri prej jush i acaruar më tha se kishin dalë në një lloj proteste dhe po thoshte që i kam gjetur në llum, nuk kishin rrugë, nuk kishin ndriçim, mbushur me plehra, ua kam bërë lagjen me rrugë me drita dhe pemë. Edhe stola kam vënë, po janë mosmirënjohës.
Unë besoj që ky është leximi më i gabuar i mundshëm i një reagimi për të cilin normal atij nuk i vinte mirë, askujt nuk i vjen mirë për më tepër kur ke parasysh atë që ai thoshte që nga ishte nisur dhe nuk e kuptonte dot sesi një komunitet të cilit i kishte bërë gjithë aty hyzmet t’i kthehej kundër.
Fakti është që sa më shumë përmirësohen kushtet, aq më shumë bie në sy si e papranueshme ajo që mungon. Kjo nuk është mosmirënjohje, është pritshmëri për standarte të tjera. Shoqëritë e varfra..kemi qenë një shoqëri e varfër, por nuk jemi më. Shoqëritë e varfra, janë shumë më tolerante ndaj mungesave.
Sepse në shoqëritë e varfra dominon mendësia që ka edhe më keq. Shoqëritë e zhvilluara që hyjnë në një fazë zhvillimi ku gjërat bëhen realitet, janë gjithmonë e më intolerante ndaj mungesave. Do të thotë se suksesi, rezultati, ndryshimi, nuk ul pritshmëritë, i rrit pritshmëritë”, tha Rama mes të tjerash.
Mesazhi i Ramës për kryebashkiakët ishte se shërbimet publike nuk duhen parë si favore për qytetarët.
Sipas tij, investimet rrisin pritshmëritë dhe qytetarët kanë të drejtë të kërkojnë standarde më të larta, edhe kur në lagjet e tyre janë bërë përmirësime. /skyweb.al
