Kanceri mbetet një nga sëmundjet më vdekjeprurëse në botë, me më shumë se 26 mijë jetë të humbura çdo ditë.
Sipas raportit të ri global të OBSH-së për kancerin, në botë regjistrohen rreth 20.6 milionë raste të reja dhe afër 10 milionë vdekje çdo vit.
Kanceri është shkaku i dytë kryesor i vdekjeve në nivel global, pas sëmundjeve kardiovaskulare.
OBSH paralajmëron se, pa masa urgjente, rastet vjetore të kancerit mund të rriten në gati 35 milionë deri në vitin 2050. Raporti tregon se pabarazitë mes vendeve mbeten shumë të mëdha, sidomos në diagnostikim, trajtim dhe kujdes mbështetës.
Në vendet me të ardhura të larta, 87% e grave me kancer gjiri mbijetojnë të paktën 5 vjet pas diagnozës.
Në vendet me të ardhura të ulëta, kjo shifër bie në rreth 42%.
OBSH thotë se më pak se një në tre vende e përfshin kujdesin ndaj kancerit në paketat universale të mbulimit shëndetësor.
“Kanceri është një sëmundje thellësisht personale që na prek pothuajse të gjithëve. Por nëse një person i mbijeton kancerit nuk duhet të varet kurrë nga vendi ku ka lindur ose nga sa fiton”, tha kreu i OBSH-së, Tedros Adhanom Ghebreyesus.
Raporti nënvizon edhe koston sociale e financiare të sëmundjes: të paktën 45% e personave të prekur nga kanceri përballen me vështirësi financiare.
Më shumë se gjysma raportojnë probleme të shëndetit mendor, ndërsa pothuajse të gjithë kujdestarët flasin për lodhje, izolim dhe barrë të papaguar kujdesi.
OBSH thekson se gati 4 në 10 raste kanceri lidhen me faktorë të parandalueshëm, si duhani, alkooli, obeziteti, mungesa e aktivitetit fizik dhe disa infeksione.
Kanceri i mushkërive mbetet shkaku kryesor i vdekjeve nga kanceri në botë, ndërsa OBSH kërkon më shumë parandalim, diagnostikim të hershëm dhe akses të barabartë në trajtim. /skyweb.al
