Një fluturim i kompanisë Ryanair nga Londra drejt Tiranës u kthye në një udhëtim 12-orësh, pasi moti i keq e detyroi avionin të devijohej dy herë dhe shkaktoi tensione mes pasagjerëve dhe ekuipazhit.
Fluturimi RK8288 u nis nga aeroporti Stansted në orën 16:00 të 3 qershorit dhe duhej të mbërrinte në Tiranë rreth tri orë më vonë. Për shkak të stuhive me bubullima në Aeroportin e Tiranës, avioni nuk mundi të ulej dhe u devijua fillimisht drejt Brindisit, në Itali.
Pas një pritjeje në pistë, fluturimi rifilloi, por kushtet atmosferike e penguan sërish uljen në Tiranë. Avioni u drejtua më pas për në Selanik, në Greqi.
Pasagjerët mbërritën përfundimisht në Tiranë rreth orës 05:00 të mëngjesit, afërsisht nëntë orë më vonë se orari i parashikuar.
Gjatë ndalesës në Selanik, situata në kabinë u tensionua. Sipas dëshmive të publikuara nga Daily Mail, disa pasagjerë ishin të irrituar nga vonesa, mungesa e informacionit dhe qëndrimi i gjatë brenda avionit.
Në bord ndodheshin edhe grupe që udhëtonin për festa beqarie dhe disa pasagjerë që dyshohej se kishin konsumuar alkool që përpara nisjes.
Fillimisht, gjatë ndalesës në Itali, pasagjerëve nuk iu lejua të blinin ushqime dhe pije. Kur shitja rifilloi, shumica e produkteve u shitën menjëherë.
Një pasagjer i dehur dyshohet se refuzoi udhëzimet e ekuipazhit dhe nisi të lëvizte nëpër kabinë. Një stjuardesë u detyrua ta kthente fizikisht në vendin e tij.
“Ajo e kapi, e ngriti si një fëmijë dhe e shtyu përsëri në sedilje. Ishte çmenduri”, tha një dëshmitar.
Tensionet arritën kulmin në Selanik, ku një grup pasagjerësh kërkoi që kapiteni të dilte nga kabina dhe t’u jepte shpjegime.
“Piloti duhet të dalë dhe të përballet me ne si burrë”, dëgjoheshin disa prej tyre duke bërtitur.
Rreth 12 pasagjerë deklaruan se nuk pranonin të qëndronin më në avion dhe kërkuan të zbrisnin.
Policia greke u thirr në bord për të rivendosur rendin dhe më pas pasagjerët që nuk dëshironin të vazhdonin udhëtimin u lejuan të largoheshin.
Një prej udhëtarëve deklaroi se kërkesa e tij për kompensim u refuzua automatikisht sapo vendosi numrin e fluturimit në sistem. Ai tha se do ta ndjekë çështjen përmes mekanizmit AviationADR.
Ryanair deklaroi se devijimet u shkaktuan nga kushte të pafavorshme atmosferike në Tiranë dhe nga stuhitë me bubullima, të cilat ishin jashtë kontrollit të kompanisë. /skyweb.al
