Ish-piloti amerikan Chesley “Sully” Sullenberger, i cili u bë i famshëm në mbarë botën pasi uli një avion në lumin Hudson dhe shpëtoi 155 persona, është diagnostikuar me Alzheimer në fazë të hershme.
75-vjeçari e bëri publik lajmin përmes faqes së tij personale, duke treguar se sëmundja është zbuluar së fundmi.
“Për momentin, kjo do të thotë se mund të mos kujtoj një emër, të harroj një histori që sapo kam treguar ose të mos fle mirë. Por jam vetëm në fillim të këtij udhëtimi të gjatë”, shkroi Sullenberger.
Ai tha se ka zgjedhur të flasë hapur për diagnozën, pasi e konsideron transparencën dhe guximin si mënyrën më të mirë për t’u përballur me këtë sfidë.
Sullenberger u bë simbol i aviacionit civil më 15 janar 2009, kur drejtonte fluturimin US Airways 1549 nga aeroporti LaGuardia i Nju Jorkut drejt Charlotte.
Vetëm pak minuta pas ngritjes, avioni u përplas me një tufë zogjsh dhe të dy motorët pushuan së funksionuari.
Duke vlerësuar se kthimi në aeroport ishte i pamundur, piloti vendosi ta ulte avionin në lumin Hudson.
Ulja emergjente përfundoi pa viktima dhe të gjithë 155 personat në bord u shpëtuan.
Ngjarja, e njohur si “Mrekullia në Hudson”, u kthye në një nga episodet më të famshme në historinë e aviacionit civil.
Historia e tij u ekranizua në vitin 2016 në filmin “Sully”, ku roli i pilotit u interpretua nga Tom Hanks.
Në mesazhin për diagnozën, Sullenberger kujtoi edhe fjalët që përdorte kur pyetej për shpëtimin e fluturimit 1549.
“Guximi mund të jetë ngjitës”, shkroi ai, duke shtuar se i njëjti guxim nevojitet tani për t’u përballur me Alzheimerin.
“Tani jam pjesë e një komuniteti më të madh dhe do ta tregojmë të gjithë së bashku këtë guxim”, përfundoi ish-piloti.
