Një skemë e dyshuar për përvetësimin e 69 milionë lekëve është zbuluar në Filialin e Postës Shqiptare në Durrës. Paratë, të destinuara për ndihmën ekonomike dhe skema të tjera sociale, regjistroheshin si të transferuara drejt degëve të Shijakut dhe Krujës, por nuk mbërrinin në arkat përkatëse.
Nën hetim janë drejtoresha e filialit, Elisabeta Mataj, shefja e financës, Valbona Duni, dhe arkëtarja Paola Dana. Ato dyshohen për veprën penale “Vjedhja duke shpërdoruar detyrën, kryer në bashkëpunim”.
Skema u zbulua pasi Dega e Shijakut refuzoi një transfertë, me pretendimin se Filiali i Durrësit kishte ende detyrime financiare ndaj saj. Verifikimet treguan se një pjesë e mandate-pagesave të regjistruara në sistem për Shijakun dhe Krujën nuk figuronin si hyrje në këto degë.
Kontrolli i brendshëm evidentoi se gjatë prillit dhe majit 2026, nga arka qendrore e filialit ishin regjistruar dalje fondesh me vlerë të përgjithshme 69 milionë lekë. Këto shuma kishin ulur gjendjen kontabël të arkës së Durrësit, por nuk ishin pasqyruar në arkat e destinacionit.
Prokuroria iu është referuar edhe pamjeve të kamerave të sigurisë. Sipas dosjes, në disa raste thasët me para merreshin nga arka dhe dërgoheshin në zyrën e financës ose në zyrën e drejtoreshës.
Në dëshminë e saj, Valbona Duni ka deklaruar se veprimet kryheshin me urdhër verbal të drejtoreshës. Sipas saj, pasi përgatiteshin fondet, Mataj kontrollonte shumat dhe i vendoste paratë në çantën personale.
“Ajo asnjëherë nuk e ka marrë thesin me të holla në dorë, por të futur në çantë. Në një rast e ka marrë të mbështjellë me një xhup bezhë që e mbante në dorë”, ka deklaruar Duni.
Hetuesit dyshojnë gjithashtu se dokumentacioni shoqërues është falsifikuar, pasi firmat e arkëtareve të degëve të Shijakut dhe Krujës në mandate nuk rezultojnë autentike.
Hetimet për përcaktimin e rolit të secilës prej tre punonjëseve dhe destinacionin përfundimtar të parave vijojnë. Personat nën hetim konsiderohen të pafajshëm deri në një vendim përfundimtar të gjykatës.
Më herët në media u raportua se paratë dyshohet se kanë përfunduar duke u luajtur në kazinotë e Tiranës. /skyweb.al
