Greqia po përgatit një ristrukturim të thellë të industrisë së saj të mbrojtjes, duke synuar të kalojë nga importimi i armëve te prodhimi vendas i teknologjisë ushtarake.
Në qendër të kësaj strategjie është programi i armatimit prej 30 miliardë eurosh deri në vitin 2036 dhe projekti i mbrojtjes ajrore i njohur si “Mburoja e Akilit”.
Programi për sistemin e ri të mbrojtjes vlerësohet rreth 3 miliardë euro, ndërsa kompanitë greke pritet të përfitojnë kontrata me vlerë të paktën 700 milionë euro. Synimi është që rreth 25% e projektit të realizohet nga industria vendase, megjithëse kjo përqindje ende nuk është përcaktuar zyrtarisht.
Përfitimi për kompanitë greke nuk do të kufizohet vetëm te kontratat financiare.
Pjesëmarrja në projekt pritet t’u japë atyre akses në teknologji të avancuara, njohuri të reja dhe zinxhirët ndërkombëtarë të furnizimit.
Në fazën e parë përmenden kompanitë EAB, EAS, METLEN, Miltech, Scytalys, Akmon, Kantieret e Salaminës dhe GEK TERNA.
Lista pritet të zgjerohet gjatë zbatimit trevjeçar të programit.
Për transportimin e sistemeve të veçanta të “Mburojës së Akilit” pritet të përdoren automjete IVECO, në bashkëpunim me METLEN dhe grupin Syggelidis.
Paralelisht, kompanitë greke kanë nisur marrëveshje bashkëprodhimi me disa nga grupet më të mëdha të mbrojtjes në Europë, SHBA dhe Izrael.
METLEN ka arritur marrëveshje me KNDS France për prodhimin në Greqi të automjetit të blinduar VBCI “Philoctetes”.
EAS dhe grupi çek CSG kanë krijuar kompaninë “Hellenic Ammunition” për prodhimin e municioneve dhe eksplozivëve në territorin grek.
Industria Ajrore Greke po zgjeron bashkëpunimin me Israel Aerospace Industries për sistemet pa pilot dhe mbrojtjen kundërajrore.
GEK TERNA ka nënshkruar marrëveshje me Rheinmetall dhe Airbus Defence & Space për sistemet tokësore, komunikimet satelitore dhe mbrojtjen e infrastrukturës kritike.
Edhe kompani më të vogla greke po hyjnë në projekte ndërkombëtare për dronë të armatosur, sisteme survejimi dhe pajisje të avancuara ushtarake.
Aktualisht, Greqia shpenzon mbi 3% të Prodhimit të Brendshëm Bruto për mbrojtjen, por industria vendase kontribuon me vetëm rreth 0.7% të ekonomisë.
Qeveria synon që programet e reja ta ndryshojnë këtë raport dhe të shmangin përsëritjen e kontratave të mëparshme, ku pjesëmarrja greke ishte e kufizuar.
Objektivi përfundimtar është krijimi i një industrie që jo vetëm furnizon Forcat e Armatosura greke, por prodhon teknologji dhe eksporton sisteme mbrojtëse në tregjet ndërkombëtare.
