Prodhuesit e avionëve, linjat ajrore dhe kompanitë e mirëmbajtjes po përpiqen të kursejnë dritaret e avionëve, pasi një incident në një fabrikë kyçe në Kaliforni përkeqësoi mungesën e një komponenti të domosdoshëm si për prodhimin e avionëve të rinj, ashtu edhe për mirëmbajtjen rutinë, thanë kompani dhe burime të industrisë.
GKN Aerospace, një nga furnizuesit më të mëdhenj në botë të xhamave të kabinës së pilotëve dhe dritareve të pasagjerëve, ndërpreu prodhimin në fund të muajit maj në fabrikën e saj në periferi të Los Anxhelosit. Shkak u bë mbinxehja e një rezervuari, e cila ngriti frikën për një shpërthim dhe detyroi evakuimin e rreth 50 mijë banorëve për disa ditë, shkruan Reuters.
Megjithëse incidenti nuk ka penguar prodhimin e avionëve të rinj apo operimin e linjave ajrore, sipas burimeve dhe drejtuesve të industrisë, ai ka shkaktuar vonesa në furnizimin me pjesë dhe ka rritur shqetësimet për mungesën e dritareve të kabinës dhe të pasagjerëve.
Prodhuesi amerikan i avionëve Boeing njoftoi se ka komunikuar me operatorët ajrorë për masat që duhen marrë në menaxhimin e rezervave të dritareve pas incidentit.
Sipas një burimi nga një kompani ajrore në Amerikën e Veriut, Boeing u ka rekomanduar linjave ajrore që t’i zëvendësojnë dritaret vetëm kur është absolutisht e nevojshme dhe jo për arsye estetike. Kompania deklaroi se vazhdon të bashkëpunojë me furnizuesin dhe po ndërmerr hapa për të zbutur çdo ndikim të mundshëm.
GKN Aerospace, në pronësi të kompanisë britanike Melrose Industries, prodhon dritare për disa modele të Boeing, përfshirë 737 MAX, si edhe për avionët A220 dhe A350 të Airbus.
Melrose bëri të ditur se po punon për ta rikthyer fabrikën, e cila tashmë është rihapur pjesërisht, në kapacitet të plotë prodhimi deri në fund të vitit 2026.
Mungesa e dritareve nxjerr në pah dobësitë që vazhdojnë të ekzistojnë në zinxhirin e furnizimit të industrisë ajrore pas pandemisë, pavarësisht përmirësimeve të dukshme gjatë këtij viti në furnizimin me pjesë.
Sipas kompanive dhe analistëve, kërkesa në rritje nga prodhuesit e avionëve, të cilët po shtojnë ritmin e prodhimit, po përplaset me kërkesën e kompanive të mirëmbajtjes që kanë nevojë për dritare zëvendësuese për të mbajtur avionët në shërbim, duke krijuar një situatë të ngjashme me mungesën e motorëve.
“Ekziston një treg shumë i madh për dritaret si pjesë zëvendësuese. Kërkesa nuk vjen vetëm nga prodhimi i avionëve të rinj, por edhe nga mirëmbajtja e flotës ekzistuese,” tha Matteo Peraldo, partner për industrinë e hapësirës ajrore dhe mbrojtjes në AlixPartners.
Edhe Airbus ka hasur mungesa të dritareve për modelin A220, por sipas një burimi të njohur me programin, kjo nuk ka shkaktuar vonesa në prodhim. Një zëdhënës i programit A220 deklaroi se, me rifillimin e prodhimit nga GKN Aerospace, po vërehen shenja pozitive drejt rikthimit të situatës në normalitet.
Kompania e mirëmbajtjes Lufthansa Technik tha se furnizimi me dritare avionësh për modelet e dy prodhuesve kryesorë ka qenë prej kohësh i kufizuar.
“Kohët e pritjes janë rritur ndjeshëm, ndërsa kostot e sigurimit të këtyre pjesëve janë shtuar në mënyrë të konsiderueshme,” tha kompania.
Për shumicën e avionëve Boeing që ajo mirëmban, furnizimi me dritare është i mundur vetëm në rastet kur pjesa është absolutisht e domosdoshme për të rikthyer në shërbim një avion të bllokuar në tokë.
