Qeveria shqiptare ka përgatitur një projektligj që parashikon krijimin e një shoqërie aksionare shtetërore për furnizimin e institucioneve publike të kujdesit shëndetësor me barna, pajisje mjekësore, produkte shëndetësore dhe shërbime mbështetëse.
Shoqëria do të ketë si objekt garantimin e qëndrueshmërisë së furnizimit, përdorimin eficient të fondeve publike dhe sigurimin e cilësisë dhe disponueshmërisë së produkteve.
Projektligji parashikon gjithashtu që shoqëria shtetërore të mund të krijojë subjekte të tjera ose të marrë pjesë në kapitalin e shoqërive tregtare publike apo private.
Këto shoqëri mund të kenë si objekt prodhimin dhe tregtimin e barnave, pajisjeve mjekësore dhe produkteve të tjera shëndetësore, si edhe zhvillimin e veprimtarive të lidhura me to.
Në këtë mënyrë, drafti hap mundësinë e krijimit të shoqërive të përbashkëta ndërmjet shtetit dhe operatorëve privatë për furnizimin e sistemit shëndetësor.
Sipas materialit të publikuar nga “Kapitali”, mekanizmi i propozuar mund të ndryshojë mënyrën aktuale të organizimit të prokurimeve për barna dhe pajisje mjekësore.
Në tekstin e draftit nuk përcaktohet në mënyrë të detajuar mënyra se si do të përzgjidhen partnerët privatë, procedurat që do të ndiqen për krijimin e shoqërive të përbashkëta apo raporti mes tyre dhe procedurave të zakonshme të prokurimit publik.
Po ashtu, në materialin e publikuar ngrihen pikëpyetje mbi ndikimin që modeli mund të ketë te konkurrenca në tregun e furnizimeve shëndetësore dhe përputhshmërinë e tij me rregullat e Bashkimit Europian.
Drafti pritet të kalojë në fazat e konsultimit dhe shqyrtimit institucional, ku do të përcaktohen më qartë struktura e shoqërisë, kompetencat e saj dhe mënyra e bashkëpunimit me subjektet private.
