Qeveria synon të kalojë kontrollin e ndihmës shtetërore te një autoritet i pavarur, përmes ndryshimeve në ligjin “Për ndihmën shtetërore”, tashmë në konsultim publik.
Projektligji ka në fokus ndihmën që shteti u jep bizneseve, përmes subvencioneve, lehtësirave fiskale apo mbështetjes financiare për ndërmarrjet në vështirësi, dhe synon të vendosë rregulla më të forta për mënyrën se si shpërndahen këto fonde.
Drafti parashikon krijimin e Autoritetit për Kontrollin e Ndihmës Shtetërore, si organ publik i pavarur, duke shfuqizuar strukturën aktuale dhe duke kaluar kompetencat te një organizëm i ri me Këshill Drejtues dhe Sekretariat.
Këshilli Drejtues do të jetë organi kryesor vendimmarrës dhe do të përbëhet nga pesë anëtarë me mandat 5-vjeçar, të zgjedhur nga Kuvendi. Kandidaturat do të propozohen nga Presidenti, Këshilli i Ministrave dhe Kuvendi.
Projektligji vendos kritere të forta për anëtarët, përfshirë minimumi 10 vite eksperiencë dhe njohuri të legjislacionit të Bashkimit Europian. Parashikohet gjithashtu deklarim i interesave ekonomikë, verifikim i integritetit dhe ndalim i funksioneve politike apo aktiviteteve që cenojnë pavarësinë.
Në thelb, Këshilli Drejtues do të ketë kompetenca të gjera, që përfshijnë:
- hartimin e politikës kombëtare për ndihmën shtetërore
- miratimin dhe autorizimin e skemave të ndihmës për bizneset
- mbikëqyrjen e përdorimit të fondeve publike dhe efektit ekonomik të tyre
- urdhërimin e kthimit të ndihmës së paligjshme
- dhënien e rekomandimeve për institucionet që shpërndajnë ndihmën
- raportimin vjetor në Kuvend për transparencën e skemave
Një nga risitë kryesore është fuqizimi i kompetencave ndëshkuese. Autoriteti do të mund të vendosë gjoba deri në 1% të xhiros vjetore për ndërmarrjet që japin informacion të pasaktë, si dhe gjoba ditore deri në 5% të xhiros për çdo ditë vonese në dorëzimin e të dhënave.
Gjithashtu, drafti i jep të drejtë autoritetit të urdhërojë kthimin e ndihmës së paligjshme dhe të monitorojë në mënyrë të vazhdueshme mënyrën se si përdoren fondet publike nga bizneset përfituese.
Në ligj përfshihet edhe koncepti i “ndihmës për shpëtim”, që i referohet mbështetjes financiare për një ndërmarrje në vështirësi, për një periudhë të kufizuar, deri në hartimin e një plani ristrukturimi ose likuidimi.
Autoriteti do të financohet nga buxheti i shtetit si zë i veçantë, ndërsa Kuvendi do të miratojë tarifat për shërbimet e tij. Shteti garanton gjithashtu burime të mjaftueshme njerëzore dhe financiare për funksionimin e tij.
Ndryshimet synojnë afrimin e sistemit shqiptar me standardet e Bashkimit Europian dhe forcimin e kontrollit mbi një nga instrumentet më të rëndësishme të ndërhyrjes së shtetit në ekonomi: ndihmën për bizneset. /skyweb.al
