Qytetarët shqiptarë duket se po kufizojnë lëvizjet me automjete për shkak të çmimit të lartë të naftës përgjatë kësaj periudhe.
Të dhënat zyrtare nga Drejtoria e Përgjithshme e Doganave, tregojnë se për herë të parë pas kaq shumë kohësh, sasia e karburanteve të importuara dhe zhdoganuara në muajin Prill rezulton në rënie në raport me Prill 2025.
Konkretisht gjatë muajit që lamë pas u zhdoganuan 52 mijë ton karburante nga 60.7 mijë ton që u importuan në Prill 2025, duke pësuar një rënie prej 8.7 mijë ton. Gjithashtu shifra është më e ulët edhe se Prill 2024.
Por edhe nëse do të bëjmë një krahasim si 4-mujor, vihet re se për Janar-Prill 2026 janë importuar 207.7 mijë ton karburante dhe rreth 11.7 mijë ton më pak se e njëjta periudhë e një viti më parë.
Për shkak të konfliktit në Lindjen e Mesme, muaji Mars dhe në vijim solli një rritje të ndjeshme të çmimit të naftës dhe benzinës në vend, duke arritur në nivele rreth 224 lekë/litër, ndërkohë që vijojnë të jenë të ndryshueshme nga dita në ditë dhe nivelet tavan të shitjes me shumicë dhe pakicë po përcaktohen nga Bordi i Transparencës i aktivizuar për këtë qëllim.
Sa i takon mallrave të tjerë të akcizës, vihet re rritje e importeve gjatë muajit Prill për cigaret, kafenë dhe birrën.
Konkretisht janë importuar 264 ton cigare, me rritje prej 31 ton në raport me Prill 2025, 962 ton kafe, që gjithashtu rezulton me rritje prej 149 ton krahasuar me muajin Prill të vitit të kaluar.
Importi i birrës po ashtu është rritur, ku u zhdoganuan 4630 ton nga 3825 ton në Prill të 2025.
Ndërsa si 4 mujor, rritje paraqet vetëm importi i cigareve, ndërsa kafeja dhe birra rezultojnë me rënie. Pritshmëritë janë që për shkak të nisjes së sezonit turistik veror, konsumi të shtohet në vijim për këto mallra, duke qenë se aktivitet e shërbimeve do të jenë në funksion të plotë të pushuesve vendas dhe turistëve të huaj./Scan
