MABCO Constructions ka njoftuar se do t’i drejtohet arbitrazhit ndërkombëtar pas nisjes së procedurave nga Ministria e Infrastrukturës dhe Energjisë për zgjidhjen e koncesionit të Aeroportit të Vlorës.
Në qendër të konfliktit qëndron përplasja mes kompanisë së Behgjet Pacollit dhe “2A Group” të Valon Ademit për aksionet dhe administrimin e shoqërisë koncesionare.
Sipas deklarimeve të bëra më herët nga Ademi, marrëdhëniet mes dy biznesmenëve u prishën për shkak të mosmarrëveshjeve që lidheshin me projekte të tyre në Libi. Përplasja mes tyre u transferua më pas në Shqipëri dhe përfshiu kontrollin e Aeroportit Ndërkombëtar të Vlorës.
Mosmarrëveshja për kuotat, administratorin dhe kontrollin e kantierit përfundoi në gjykata, kallëzime penale dhe përplasje mes punonjësve të dy kompanive.
Punimet në aeroport u bllokuan, ndërsa në maj 2026 u desh edhe ndërhyrja e Policisë së Shtetit pas tensioneve në hyrje të kantierit.
MABCO pretendon se është mbajtur jashtë aeroportit për gati një vit dhe se institucionet nuk kanë reaguar ndaj më shumë se 90 shkresave të dërguara pranë Ministrisë së Infrastrukturës.
Kompania deklaroi sot se më 18 maj 2026 iu ndalua hyrja në kantier, duke u pamundësuar punonjësve dhe nënkontraktorëve vazhdimin e projektit.
Gjykata e Lartë rrëzoi më 26 maj masat e mëparshme që kufizonin të drejtat e MABCO-s, por konflikti për administrimin e aeroportit vijoi.
Qeveria e shqetësuar se Pacolli mund ta ketë lënë Aeroportin e Vlorës peng te Delphos
Ndërkohë, projekti strategjik, i cili duhej të ishte përfunduar dhe të kishte nisur operimet, mbeti peng i betejës mes dy ortakëve.
Ministria e Infrastrukturës ka nisur procedurat për prishjen e kontratës, duke iu referuar mosrealizimit të punimeve dhe detyrimeve të koncesionarit.
MABCO kundërshton këtë argument, duke thënë se shteti e pengoi të punonte dhe tani po përdor mosrealizimin e punimeve si shkak për ndërprerjen e kontratës.
Kompania deklaron se ka bërë përpjekje për shmangien e arbitrazhit, por se nisja e procedurës së zgjidhjes së koncesionit nuk i lë më alternativë tjetër.
Konflikti i mëparshëm mes Pacollit dhe Ademit, i lidhur me projektet e tyre në Libi, rrezikon tashmë të prodhojë një proces ndërkombëtar kundër Shqipërisë dhe një faturë të re për projektin e bllokuar të Aeroportit të Vlorës./skyweb.al
