Çmimet e naftës mbeten në nivele të larta, ndërsa përshkallëzimi i ri i tensioneve në Lindjen e Mesme ka rikthyer shqetësimet për furnizimin global.
Në kuotimet e fundit të së premtes, nafta Brent tregtohej rreth 103–104 dollarë për fuçi, ndërsa nafta amerikane WTI rreth 99–100 dollarë. Tregjet janë të mbyllura të dielën, por sulmet e ndodhura gjatë fundjavës mund të ushtrojnë presion të ri mbi çmimet me hapjen e bursave.
Houthit e Jemenit deklaruan se kishin goditur me raketa dhe dronë objektiva të ndjeshme në Riad, ndërsa flakë dhe tym i dendur u panë pranë aeroportit të kryeqytetit saudit.
Tensionet prekën menjëherë tregjet e Gjirit. Indeksi kryesor i bursës saudite ra me 0,5%, ndërsa aksionet e kompanisë shtetërore Saudi Aramco humbën 0,6%.
Situata bëhet më shqetësuese pas dëmtimit të naftësjellësit strategjik Lindje–Perëndim, i cili lidh zonat prodhuese të Arabisë Saudite me portin Yanbu në Detin e Kuq. Sipas Reuters, sulmet me dronë dëmtuan tre stacione pompimi dhe penguan përkohësisht ngarkimin e naftës në port.
Saudi Aramco ka njoftuar të paktën dy rafineri europiane se nuk do të marrin furnizimet e planifikuara për muajin tetor.
Rikthimi i pjesshëm i naftësjellësit mund të ndodhë brenda disa ditësh, por rivendosja e kapacitetit të plotë mund të kërkojë deri në gjashtë javë. Arabia Saudite po përpiqet të kompensojë mungesat duke shtuar eksportet përmes Gjirit dhe duke realizuar transferime mes anijeve pranë portit Sohar në Oman.
Kjo zgjidhje e përkohshme uli frikën për një ndërprerje totale të furnizimit dhe ndikoi në tërheqjen e çmimeve gjatë së premtes.
Megjithatë, sulmet e reja ndaj Riadit dhe infrastrukturës saudite pritet ta rikthejnë pasigurinë me hapjen e tregjeve. Një tjetër burim presioni vjen nga Rusia, ku një sulm masiv me dronë dëmtoi një pjesë të rafinerisë së naftës në Moskë.
Sulmet e vazhdueshme ndaj kapaciteteve ruse të përpunimit kanë shkaktuar mungesa karburanti, rritje çmimesh dhe radhë në pikat e furnizimit në disa rajone.
Qëndrimi i Brent mbi 100 dollarë për fuçi shton rrezikun e shtrenjtimit të karburanteve edhe në tregjet importuese. Për Shqipërinë, ndikimi do të varet nga kohëzgjatja e krizës, kursi euro–dollar, rezervat e operatorëve dhe niveli i taksave mbi karburantet. /skyweb.al
