Agjencia e Mbikëqyrjes Policore ka publikuar bilancin e veprimtarisë për muajin korrik 2026, ku raportohen 54 referime në Prokurori, që lidhen me po kaq punonjës policie. Nga këto, 15 janë punonjës të nivelit të parë drejtues, ndërsa 39 i përkasin nivelit zbatues. Në kuadër të veprimeve hetimore janë referuar gjithashtu edhe 11 shtetas.
Gjatë muajit janë kryer 11 arrestime në flagrancë, prej të cilave 8 punonjës policie dhe 3 shtetas.
Sipas AMP-së, 54 çështje penale të referuara janë klasifikuar sipas natyrës së veprave. 14 çështje lidhen me shpërdorimin e detyrës, ndërsa 10 çështje me shpërdorim detyre dhe favorizim të veprimtarive të kundërligjshme. Pjesën më të madhe e zënë 25 çështje për veprime arbitrare, dëmtime të tjera me dashje, kanosje dhe vepra të ngjashme, ndërsa 5 çështje lidhen me shkeljen e rregullave të qarkullimit rrugor.
Në fushën disiplinore, Komisioni Disiplinor ka vendosur fillimin e hetimit disiplinor për 6 punonjës policie, ndërsa për një punonjës ka vendosur mosfillimin e hetimit, pasi shkelja ishte parashkruar. Për 26 punonjës policie dhe 2 punonjës të MNZSH-së, procedurat ndodhen në fazën e shqyrtimit të dokumentacionit.
Edhe numri i ankesave të administruara gjatë korrikut ka qenë i konsiderueshëm. AMP raporton 111 ankesa të trajtuara, nga të cilat 15 të bazuara, 62 të pabazuara, 32 të patrajtuara, ndërsa për 2 raste janë hapur dosje penale. Krahas tyre, janë trajtuar edhe 160 ankesa administrative.
Në linjat e komunikimit me qytetarët janë regjistruar 420 telefonata. Prej tyre, 253 kanë qenë brenda fushës së veprimtarisë së AMP-së, 104 jashtë kompetencës, ndërsa 63 telefonata kanë shërbyer për dhënien e informacionit.
Gjatë muajit korrik janë zhvilluar gjithashtu 3 inspektime, një i planifikuar dhe dy të paplanifikuara, ndërsa në fushën e hetimeve AMP ka evidentuar edhe 54 referime penale në kuadër të kontrollit të veprimtarisë së punonjësve të strukturave policore.
