Kryeministri Edi Rama ka njoftuar se Shqipëria është renditur në vendin e parë në botë në National Cyber Security Index (NCSI), me 98.33 pikë, duke e cilësuar rezultatin si një arritje historike për vendin.
Në një postim të gjatë në rrjetet sociale, Rama e lidhi renditjen e re me transformimin e sistemit të mbrojtjes kibernetike pas sulmit të madh të Iranit ndaj Shqipërisë më 15 korrik 2022.
Sipas kryeministrit, në atë kohë mbrojtja kibernetike e vendit ishte ende e dobët dhe sulmi rrezikoi të godiste rëndë infrastrukturën digjitale të shtetit dhe shërbimet publike online.
Por Rama thotë se pikërisht kjo goditje u kthye në pikënisjen e një sistemi të ri mbrojtjeje, me investime në teknologji, kapacitete profesionale dhe një arkitekturë të re të sigurisë kibernetike.
“Në vitin 2023 kaluam në vendin e 54”, shkruan Rama, ndërsa sipas tij Shqipëria u ngjit në vendin e 15 në vitin 2025 dhe tashmë ka arritur kreun e renditjes botërore me 98.33 pikë.
Kryeministri veçoi edhe bashkëpunimin me partnerët izraelitë për zhvillimin e sistemit të ri të mbrojtjes, ndërsa tha se Shqipëria ka futur edhe një model të Inteligjencës Artificiale proaktive në arkitekturën e saj kibernetike.
Sipas Ramës, sulmet kibernetike nga Irani dhe aktorë të tjerë nuk kanë reshtur, por tashmë janë neutralizuar pa shkaktuar ndërprerje të ngjashme me atë të vitit 2022.
“Regjimi i Teheranit deshi të na tregonte sa të dobët ishim. Në fakt, na detyroi të bëhemi fuqia që jemi sot në mbrojtjen e Shqipërisë Digjitale”, shkruan Rama.
Kryeministri paralajmëroi se puna nuk përfundon me renditjen e parë, duke theksuar se mbrojtja kibernetike duhet të zgjerohet më tej edhe në sektorin privat.
